God framdrift langs E39

Statens vegvesen er i full gang med den omlag 600 meter lange leidningsgrøfta langs E39 mellom Svegatjørn og Ulvenvatnet.

I grøfta kjem det kommunale røyr for vassleidning og spillvatn, pluss overvassleidning for vegvesenet.

– Dimensjonane på overvassleidningen er 120 cm betongrøyr. Dei kommunale røyra har ein diameter på 40 cm, forklarar Geir Brekke, kommunikasjonsrådgjevar i Statens Vegvesen i ei melding til Midtsiden.

Sprenger seg fram

Den 600 meter lange grøfta blir mellom tre og fem meter djup.

– Det er sprengt ein god del fjell for å få plass til alle dei tre røyra. Difor er det eine køyrefeltet på E39 stengd mellom Tøsdalsskiftet og Moberg for trafikken nordover mot Bergen.

– Anleggsarbeidet vil gå føre seg i heile sommar og ut august. Planen er å opne E39 igjen med to felt i båe retninger 4. september, fortel Brekke.

I mellomtida må dei som skal køyre nordover på E39 køyre gamlevegen om Os sentrum.

– Trafikantane må berekna noko lengre køyretid gjennom Os, avsluttar Brekke.