God Idol-oppleving som vaksen

Ada Mathilde Brakstad Keita (25) har sidan ho flytta til Os vore å sjå på ulike scenar i bygda, og i musikkvideoar i samarbeid med osingen Vegard Skorpen.

I mars i fjor sleppte Ada Keita Band musikkvideoen til den første låten på det komande debutalbumet sitt på Midtsiden.

– Albumet er så og seia ferdig, berre finpuss gjenstår, fotel Ada til Midtsiden.

– Godt å delta som vaksen

Ada er ein av minst tre frå Os som deltar i årets Idol. I førre veke fortalde vi om Martine Frotveit Johnsen (17).

– Eg prøvde meg òg då eg var yngre. I 2009 deltok eg i X-Factor, fortel Ada.

Ho var blant dei siste 24 av 9000 påmeldte då ho røyk ut.

– Det var ei fin og lærerik oppleving, men det var endå meir positivt å delta i Idol i vaksen alder.

– Tenåringar er ofte sårbare, det kan vera vanskeleg å forstå at du kan ha ein musikalsk verdi sjølv om ein TV-produsent eller ein jury der og då seier noko anna.

Frå reggae til country

Ada er dotter av afropop-artisten Salif Keita. Med bandet sitt skriv og syng ho helst retropop, soul og jazz - men den siste tida har ho vore innom fleire sjangrar.

– Ved sidan av skriving og jobb i studio har eg sunge mykje, blant anna i Bergen, med ulike artistar og i fleire andre sjangrar, frå hiphop til country.

På Idol-audition syng ho Fugees sin versjon av «Killing me softly».

– Eg hadde med meg ein av dei mest tolmodige venane mine, Yvonne Helland, som eg studerte saman med. Eg visste det blei ein lang dag. Det var intenst, men veldig gøy.