Bildeserie:
I sommar fekk Os Turn innvilga søknad om å få Telenor Xtra til Kuventræ, fotballforbundet sitt tilbod for ungar etter skuletid.
SJÅ VIDEO NEDST I ARTIKKELEN
Telenor Xtra er eit tilbod for ungar frå 3. til 7. klasse, etter skuletid, der ungane får mat, tid til lekser og cirka ein time med fotballtrening.
– Eg var heldig som fekk denne jobben, akkurat då den førre jobben min forsvann i konkurranseutsetjing, seier Sylvia Vangsnes.
Ho har jobba med reinhald og i barnehage i 17 år, og har ved sidan av reinhaldsjobb for Os Turn ansvar for å servera dei unge elevane mat før og etter trening.
Mat, lekser og trening
– Dei kjem rett frå skulen, til ulike tider ut frå klassetrinn og vekedag, og set seg ned med spel eller lekser fra til fellesmåltid klokka 14.
Litt før klokka 15 kjem fotballinstruktørane og tar med seg gjengen ut på banen for trening fram til klokka 16. Den siste halvtimen sit ungane og et frukt fram til dei går heim eller blir henta i 16.30-tida.
– Det er ein snill gjeng, vi har god atmosfære i klubbhuset, også for dei som vil gjera lekser. Og er det nokon som tullar seg så har eg faktisk både gule og raude kort liggande, ler Sylvia.
Dei som får raudt kort får ikkje vera med på dagens trening.
Frå 6 til 19 spelarar per dag
Mats Cato Moldskred, som nyleg signerte kontrakt med Os Turn, er fulltidstilsett i klubben, blant anna som hovudintstruktør for Telenor Xtra.
– Vi har plass til 20 ungar per dag, måndag til torsdag. Nokon kjem éin dag i veka, andre oftare, det vel dei sjølv, forklarer han.
Tysdag og torsdag er det 14 og 19 ungar der, måndag og onsdag 6 og 10. Dei dagane det er over 10 elevar har Mats Cato med seg ein ekstra trenar, som i går, då Robin Hjertnes var med.
– No har vi berre 3. til 5. klasse, men når vi utvidar til 6. og 7. klasse tar vi nok desse i ei eigen gruppe.
– Livleg, men konsentrert
Moldskred, som fylte 27 år då Midtsiden var oppom i går, seier han trivst i selskap med dei unge spelarane.
– Dei seier mykje morosamt, seg i mellom og til meg, vi ler mykje.
Mats Cato har også sine metodar for å halda ungane konsentrerte.
– Eg slepp dei ut på banen i 5-10 minutt før treninga startar, let dei springa av seg litt først. Og så set vi opp øvingar og bruker øvingane som ligg i Telenor Xtra-programmet frå fotballforbundet.
– Gøy trening og deilig mat
Stemninga var stor blant elevane då det kom journalist på besøk.
– Vi har veldig gøy trening, eg har blitt meir teknisk etter at eg byrja på FFO, seier John Phillip.
– Og så er det veldig deilig mat her, legg Filip til, medan han et i seg frukt før han skal heim.
VIDEO: Sjå FFO-dagen på eitt minutt. (Foto: Kjetil Vasby Bruarøy)