Godkjende 258 bueiningar

I tysdagens møte handsama kommunestyret dei to reguleringsplanane for Hjellemarka II og III. Begge dei to planane blei godkjende etter at dei hadde blitt betre samkøyrde enn tidlegare.

- Reguleringsplan for Hjellemarka II og Hjellemarka III er no betre samkjørt og dei to utbyggjarane og planleggjarane har justert planane i fellesskap, skriv plansjef Asle Andås i saksutgreiinga.

Mellom anna har dei to tiltakshavarane Bøe & Lepsøy Utbygging AS og Markhus Bygg AS justert reguleringsføresegnene i høve til inngjerding av leikeplassar, fartsgrensar og murhøgder.

Hjellemarka II

Området ligg lengst nord av dei to områda og er på om lag 70 dekar.

Reguleringsplanen godkjenner 116 bueiningar fortel på 34 i rekkjehus og 82 leilegheiter i blokker på tre til fem etasjar.

- Fylkesmannen ser positivt på at både høgdedraga og strandsona er sett av til friluftsområde og at det er sikra gjennomgåande grøn struktur, skriv Andås i utgreiinga.

Ned mot Gåsakilen er det sett av eit 30 meter breitt belte som friområde. Tilkomst til feltet vil gå gjennom Hjellemarka I og Hjellemarka III.

Nytt kryss og buss i bustadfelt

Det blir laga nytt kryss frå Byvegen opp til Hjellemarka III.

Dette krysset kjem i området der dyrka mark i dag treff skog, der gang- og sykkelstien svingar eit stykke vekk frå bilvegen.

Nytt blir også buss gjennom bustadfelt. Det er planar om at vegen skal ha bom, men bussen skal passera og cruisa gjennom dei nye bustadfelta så folk slepp å gå til Byvegen for å ta kollektivtransport.

Hjellemarka III

Også dette området er omlag 70 dekar. Reguleringsplanen godkjenner 142 bueiningar fordelt på blokkar/terrassebygg på henhaldsvis tre til fire etasjer og fire til fem etasjar.

I saksutgreiinga stiller ein spørjeteikn om ein ønskjer ei slik tett utbygging i dei to områda, samstundes ser ein at terrenget er slik at det ikkje passar for reine einebustadar, men meir for terrassebygg og større bygg mellom åsryggane.

- Dermed kan ein bevara åsryggane og området sin karakter, skriv Andås.

Markus Bygg AS har som tiltakshavar for Hjellemarka II sikra området ned mot Gåsakilen som natur-/friområde.

I Hjellemarka III er det òg regulert inn ein barnehage med fire avdelingar.