Godt gras og nye skur
Elevar frå Os vidaregåande skule er med på å førebu Kuventræ på sesongstart.
Laurdag startar serien for Os sitt A-lag og anlegget er i ferd med å bli klart for heimekamp mot Bjarg.
– I fjor byrja ikkje A-laget å trena på gras før 17. maifeiringa var over. Det var for mykje frost i bakken etter den lange, kalde vinteren, fortel banemeister Arvid Hjelle.
– Men i år har det vore varmare, gutane trente på graset allereie før påske og sjølv om det har kome litt vatn denne veka kan det godt henda at dommaren let seriestarten gå på gras.
Bygger nye innbytarskur
Det er ikkje berre banen som i desse dagar blir førebudd på sesongens første kamp, dei to gamle plastskura ved grasbanen er kasta vekk og skal bli erstatta.
– Det blir to nye treskur i same stil som på kunstgrasbanane, fortel Hjelle.
Os Turn får hjelp av elevar frå Os vidaregåande skule, som allereie har støypt 7 meter lange solar som skura skal stå på.
I dag leverte XL Bygg dragarar til begge skura og målet er å få dei ferdige til laurdag.