- Godt å opna igjen

I går var det møte med foreldra, i dag kom nøgde ungar tilbake til Søfteland skule.

Kjetil Vasby Bruarøymandag 26. okt. 2009 13:13

- Dagen starta som ein vanleg skuledag, med smilande elevar som kom og sa "hei rektor". Det var veldig kjekt, seier Kåre Lutro.

Etter å ha halde stengt torsdag og fredag grunna trugsmål er det vanleg skuledag på Søfteland igjen i dag.

Samla elevane
Klokka 9 blei alle elevane frå 1. til 6. klasse samla i gymsalen for å snakka om situasjonen skulen har vore gjennom.

- Eg snakte til elevane, og sa dei som hadde spørsmål eller noko dei ville fortelja, kunne ta dette i klasseromma.

Klassestyrarane fortel om få spørsmål og snakk om det som har skjedd, og noko som ser ut til å vera fin stemning blant elevane.

Press frå media
Klokka 9.30 var det dei eldste elevane sin tur å få informasjon frå rektor. Også dei fekk beskjed om at dei gjerne kunne ta spørsmål på klassenivå, eventuelt koma til rektor med dei.

- Det har vore nokre elevar oppom til meg, blant anna dei som har uttalt seg til media i denne saka.

Dei fortalte at etter at dei hadde vore på TV så hadde journalistar frå andre aviser vore pågåande.

- Dei har nok lært litt av dette, trur rektor.

Lite informasjon
Foreldremøtet sundag var ikkje ope for pressen.

- Kommunen arrangerte møtet, der vi frå politiet orienterte så godt vi kunne, fortel lensmann Rasmus Dalen.

Oppmøtet var godt rundt 150 foreldre stilte for å få meir informasjon.

- Mange hadde nok venta å få meir informasjon enn dei fekk. Dei fleste spørsmåla handla om innhaldet i trugsmålet, og om politiet var sikre på at dei har tatt rett person. Ingen av desse spørsmåla fekk vi svar på, fortel far til to av elevane.

- Stemninga blei litt amper då dei ikkje fekk svara dei trudde dei skulle få, men sjølv forstår eg at politiet ikkje kan gå ut med ting som kan uroa etterforskinga. Og skyldspørsmålet er det ikkje politiet som skal avgjera.