– Gøyare enn vanleg skule
26 elevar samla på forskarfabrikken i Os barneskule denne veka. – Vi får gjera ting vi ikkje gjer på skulen, strålar ungane.
Bildeserie:
Forskerfabrikken er sosialt entreprenørskap i naturfag og matematikk og ønskjer å gjera forsking til eit attraktivt fritidstilbod for barn og unge, på lik linje med for eksempel idrett og musikk.
Denne veka blir Forskarfabrikken arrangert for første gong i Os, nærare bestemt i klasseromma til Os barneskule. Opplegget er for elevar som skal byrje i 5. til 7. klasse no i haust.
– Vi har fullt opp med 26 elevar. I tillegg hadde vi fleire på venteliste, fortel Ingeborg Solvang, som saman med Olav Sande er lærarar på skulen.
Fann meteorittar
Elevane har fått utlevert det dei treng av utstyr, mellomanna kvart sitt mikroskop.
– Sjå her. Dette er ein meteoritt.
– Eg fann ein slik og ein slik, fortel Emma Sofie og peikar i boka etter å ha dobbeltsjekka i mikroskopet.
Det å sjå i mikroskopet er spennande fortel forskarspira.
– Det som er spennande er å sjå om eg finn noko, smilar ho.
Måndag var nemleg elevane ute og samla prøver ved hjelp av kratftige magnetar for å sjå om dei fann noko av dei omlag 60 kilo med mikrometoritter som kvart døgn fell ned over Noreg.
Dyrkar bakteriar
Ei anna av oppgåvane elevane har fått er å laga ei hypotese om kor det er flest bakteriar.
– Er det mest på dolokket eller dørhandtaket?
– Det er dei ikkje samde om, men vi har teke prøvar av fleire plassar, som dei i løpet av veka skal freiste å dyrka fram, for å sjå på i mikroskopet mot slutten av veka, forklarar Solvang.
– Kjekt å ha noko å gjera
Då Midtsiden vitja Forskarfabrikken tysdag sto elektriske partiklar, kretsar og edderkoppar på programmet. Blant oppgåvene elevane fekk testa var om dei klarte å flytta ein brusboks ved hjelp av ein ballong utan at desse var borti kvarandre og om dei klarte å få lys i ei lyspære ved å bygga ein krets.
Litt frykt for støt var det nok blant enkelte, men dei gjekk på oppgåven med liv og lyst.
– Er det ikkje kjedeleg å sitta på skulen når de kunne vore ute og bada eller leika?
– Nei, det er gøyare å vera her.
– Her har vi noko å gjera på. Vi slipp å sitta inne og sjå på TV.
– Dessutan får vi testa ting som vi ikkje får lov til heime. Også blir vi kjent med nye folk, fortel Malin, Karoline, Anders og Marcus entusiastisk medan dei koblar ledningane for å sjå lyset.
Onsdag skal dei mellomanna få freista å byggja ein rakett før veka held fram med nye eksperiment. At matematikk og naturfag fengjer er det i allefall liten tvil om.