Gøymde seg på taket

Det har vore ei relativt roleg natt for patrulja frå Os og Austevoll lensmannskontor.

– Det kom ei melding om festbråk ute i Strønevegen. Der var patrulja ute og snakka med ungdommane som hadde fest og gav dei pålegg om å roa seg ned. Vi høyrde ikkje noko meir, så då er det grunn til å tru at dei etterkom pålegget, seier politibetjent Sindre Lekven Hallem.

Klatra på taket

I 0330-tida fekk patrulja melding om at to personar hadde tatt seg opp på taket til restaurant Hamnechefen i Os sentrum.

– Patrulja reiste bort der og plukka dei ned igjen. Han eine kom med ein gang politiet ba dei om å komma ned. Han andre tykkja det var lurare å prøve å gøyme seg for patrulja oppe på taket, men også han blei henta ned.

– Då begge vel var nede var dei forsåvidt hyggelege og greie gutar som fekk pålegg om å fjerna seg frå Os sentrum, noko dei begge gjorde.

– Patrulja tok ei runde på taket for å sjå om noko var skadd, men det såg det ikkje ut som det var, avsluttar politibetjenten.

Fann marihuana

Søndag ettermiddag fekk Midtsiden ei oppdatering frå kokk Frank Vasby Bruarøy.

– Dei hadde knust glass bak baren og stole to brus på taket. I tillegg fann eg ein boks med marihuana, pluss ei kvittering med namn på i boksen. Politiet henta det tidlegare i dag. Dei får nok meir å svare for konkluderte politiet med då dei var her, fortel Bruarøy.