– Greitt å få øva
Brannvesenet har hittil i år rykka ut på kun éin bustadbrann. – Ingenting er betre enn det, men samstundes treng vi halde kunnskapen ved like.
Bildeserie:
Tysdag førmiddag kunne ein på lang avstand sjå røyk frå Lepsøyneset. Årsaka var at brannvesenet brann ned eit gamalt uthus/bustadhus på oppdrag frå grunneigaren.
– Vi har vore heldige på Os.
– Folk har tatt det førebyggande brannvernet på alvor, så vi har vel hatt berre ein bustadbrann så langt i år.
– Men, ser vi på landsbasis, så rapporterast det dagleg om alvorlege branner, difor er det viktig at vi får øva mannskapa jamnleg, fortel Anne Kjersti Storebø, leiar for forebyggande eining i Os brann, beredskap og legevakt.
Sleit med å få fyr
Heldigvis, får ei vel nesten seia, visar det seg at brannfolka er betre til å halde kontroll på flammene enn å setja fyr på ting.
– Dette uthuset var så råttent, at øvinga i dag går på å hindra spreiing til nabohuset og å lesa brannutviklinga.
– Det var for risikabelt å skulle senda inn røykdykkarane, men dei skal få prøva seg seinare i veka. Då vi skal øva i eit hus i Solstrandsvegen.
– Sidan det har stått utan takstein ei stund, sleit vi med å få flammane til å ta tak. Det var rett og slett skikkeleg blautt, fortel Storebø medan flammane etterkvart får tak i det gamle uthuset.
Skummel strålevarme
Medan uthuset brenn ned, konsenterar dei fem brannkonstablane seg om å kjøla ned hovudhuset fem meter unna og å passa på at brannen ikkje sprer seg til terrenget rundt.
– Du veit det kan fort bli ein 600 til 1000 grader i ein brann som dette, så strålevarmen kan vera nok til at nabohus tek fyr.
– Difor er ein viktig del av øvinga å sørge for at det ikkje skjer, avsluttar Storebø.