To gull i Berlin

Om fjorten dagar reiser han til Malaysia og Verdsmeisterskapet i karate. Som oppkøyring til VM deltok landslaget i helga på eit stort internasjonalt stemne i Berlin.

Åsmund Slettevold som går i junior -76 kg og i open klasse fekk ei stri helg med heile åtte kampar, men med to gull heim i kofferten.

- Det var ei heil suveren oppkøyring til VM.

- Eg har aldri gått så mange kampar i eit stemne før, fortel Åsmund Slettevold.

God kontroll

Kampane går etter eit cup-system kor vinnaren tek seg videre til neste kamp. I -76 kg stilte omlag 16 utøvarar til kamp, medan det i open klasse var omlag 40 deltakarar.

- Eg følte eg hadde god kontroll i alle kampane og låg aldri under på poeng.

I jr -76 kg møtte guten frå Søre Neset ein tysk utøvar som fekk smake den norske slagkrafta.

- I open klasse møter eg den norske meisteren i tungvektsklassa.

- Gard, eg hugsar ikkje etternamnet hans i farta, er kjempegod og det blei ein tøff kamp, fortel Slettevold.

Trenaren imponert

Trenar Cato Bruarøy fekk seg ikkje ein Tysklandstur denne gongen, men fekk med seg eleven sine prestasjonar heimefrå.

- Dette er ein av dei aller beste prestasjonane til Åsmund.

- Eg hadde eit håp etter at han vann NM og Stockholm Open tidlegare i sommar, men at han skulle vera så god hadde eg ikkje turt å håpe på, seier Bruarøy.

Førsteårs-senior

Storebror til Åsmund, Erlend Slettevold var òg med i Tyskland.

- Erlend er førsteårs senior og planen er at han skal gå mest mogleg internasjonale stemne for å venja seg til seniornivået, forklarar Bruarøy.

Erlend fekk eit tøffare stemne enn lillebroren og måtte til slutt ta til takke med ein sjuende plass i -75 kg.

- Som Åsmund fekk Erlend ein rekkje kampar i beina sidan han gjekk både lag og open klasse i tillegg til si individuelle klasse, avsluttar Cato Bruarøy.