Håper på roleg desember

Dei tre største brannårsakene i Hordaland i perioden 2002-2011 er open eld med 28 prosent, feil bruk av elektrisk utstyr med 23 prosent og feil i el-anlegg med 19 prosent. I 16 prosent av brannane er årsaken ukjend.

- Kos med levande lys, bruk av peisen og auka bruk av elektrisitet og elektrisk utstyr, kanskje i kombinasjon med alkohol, fører til auka risiko for brann i desember. Det er viktig å tenkje branntryggleik, sjølv om ein hyggjer seg, seier Anne Kjersti Storebø, leiar for førebyggjande avdeling Os brann og redningsvesen.

Set søkjelys på branntryggleik

For å setje søkjelyset på branntryggleik i heimen, blir kampanjen Aksjon bustadbrann arrangert i desember. Direktoratet for samfunnssikkerheit og beredskap, Norsk brannvernforeining og Gjensidige står bak kampanjen, medan representantar frå brann-/feiarvesen, det lokale elektrisitetstilsynet og lokale Gjensidige-kontor står for den praktiske gjennomføringa.

Os brann og redningsvesen står for gjennomføringa av kampanjen lokalt gjennom tilsyn i eindel av heimane i Os.

- Det dreiar seg ikkje om eit tilsyn i vanleg forstand, men om ein enkel kontroll, med rettleiing og informasjon. For bebuarane er sjekken friviljug, og kontrollørane vil legitimere seg når dei ringjer på, forklarar Storebø.

Røykvarslar reddar livet ditt

Kvart besøk vil ta omlag 30 minutt og ta for seg varslingsutstyr, sløkkjeutstyr, elektriske apparat og anlegg, eldstader og skorstein og rømningstilhøve.

- Det kostar ikkje mykje å kjøpe røykvarslarar til bustaden din, men dei kan redde livet ditt.

- Alle bustader er pålagd å ha minst éin fungerande røykvarslar, som kan høyrast på alle soverom med lukka dør. Det beste er å ha samankopla røykvarslarar i alle rom. Då pip alle varslarane samstundes ved brann, seier Storebø.

1. desember er røykvarslaren sin dag. Hugs å bytte batteri, sjølv om det framleis er låt i den.