Har rusta betydeleg opp
Os vidaregåande skule har i løpet av dei tre siste åra blitt rusta opp for mellom 20 og 25 millionar. Tysdag blei det lagt 7500 kvm asfalt.
Bildeserie:
Sidan Os vidaregåande skule blei bygd i 1981 har det vore heller dårleg med opprusting av skulen, men i løpet av dei tre siste åra har skulen fått eit betydeleg løft.
– Vi har fått nytt tak og ventilasjonsanlegg for heile skulen. No skal vi nytta 4,5 millionar kroner på nye ventilasjonskanalar for å få anlegget opp på dagens standard og krav til kapasitet.
– Vi har òg fått bytta vindauge i alle bygg og etterisolert, seinast no i hovudbygget kor vi har lærarrom og kantina. Kantina brukte vi nyleg 750 000 kroner på. Vi har vore gjennom ei betydeleg oppgradering som hjelpte bra på miljøet, fortel rektor Henrik Lassen.
Verdifull eigeninnsats
Yrkesskulen, som utdannar nye fagfolk i ei rekkje av faga som trengs for å rusta opp skulen har ikkje berre sett på at eksterne har jobba.
– Både linja for anleggsteknikk og byggfag har gjort delar av jobbane. Byggfag-lina har mellomanna stått for riving av 3-400 kvadratmeter med gamle brakker og tatt finpussen på dei nye modulbrakkene som utgjer D-bygget.
– Anleggsteknikklina har stått for opparbeidinga og utjamninga av området bak transportbygget og vegen rundt skulen.
– Det har vore ei viktig oppgradering slik at vi no slepp å køyra dei store bilane innimellom parkerte bilar og elevane.
– Dessuten har dei fått ei mykje betre oppstillingsplass og område for å driva undervisning, mellom anna truckundervisninga.
Slepp frysa
Siste skot på stamma er ein ny isolert stålhall på 12 x 18 meter.
– Den erstattar ein gamal plast rubb-hall vi nytta tidlegare. Der blei det fort kaldt om vintarane, så at vi har fått på plass stålhallen vil bidra til eit betre arbeidsmiljø.
– Kven er det som skal nytta hallen?
– Det er primært anleggsteknikk i undervisninga om korleis legga røyr og lignande på anlegg.
– Men vi held òg eindel kurs for eksterne entreprenørar og bedrifter i det som er kalla ADK (Anlegg, drift og kontroll). Dei skal òg få komma inn i varmen, smiler Lassen.
Ei av dei største maskinparkane i landet
Os vidaregåande skulen er blant yrkesskulane med den største bil- og maskinparken i landet.
– Det skuldast at lina for anleggsteknikk og yrkessjåfør er landsliner. Staten betalar difor mykje av utstyret på desse linene. Hadde vi vore ei vanleg yrkesskule finansiert frå fylkeskommunen så hadde nok ståa vore annleis.
– Eit døme på det er dei fem nye lastebilane vil leasa i fjor haust, kvar av dei har ein verdi på rundt 1,5 millionar kroner.
– Den tjue tonn tunge dumparen du ser der borte er eit anna døme. Den har ein verdi på rundt 2,4 millionar, så det er litt av ein park vi rår over, avsluttar rektoren.