Har sendt ut kokevarsel til 888 hus

Os kommune har i dag sendt ut kokevarsel til 888 abonnentar, inkludert bustadar, skular og barnehagar, etter funn i høgdebassenget på Bjørnen.

– Rutinemessig prøvetaking viser indikasjon på forureining. For å vera på den sikre sida har vi sendt tekstmelding til alle som får vatn frå høgdebassenget, seier Os kommune i ei pressemelding i dag.

Abonnentar innanfor området markert i raudt må kokadrikkevatnet.

– Vi tar nye prøvar av vatnet i dag. Alle berørte vil få ny melding når kokevarselet er oppheva, opplyser kommunen.

Fine prøvar i førre veke

Funnet er ikkje gjort i Bjørnavatnet, men ein tank på Bjørnen med vatn frå Os VBA, som reinsar vatn frå Krokavatnet.

– Kor tid blei førre vassprøve tatt?

– I førre veke. Dei prøvane var fine. Det blir tatt prøvar kvar veke, seier einingsleiar Agnete Haugland.

Tanken er stengt av og det er tatt nye prøvar i dag, av vatnet som kjem ut av høgdebassenget.

Os kommune får svar på desse prøvane i morgon.