Hausten og jula i Oseana

Bildeserie:

1 av 2

– No står det 13 arrangement att, og det på knappe 14 dagar, fortel arrangementssjef, Berit Steen.

– Det har vore travelt, men no vert det endå travlare her i førjulstida.

Kalkulerte risikoar opp mot treffsikre arrangement

Saman med markeds- og kommunikasjonsansvarleg Veronica Søilen Halhjem kan Steen allikevel sjå tilbake på eit innhaldsrikt haustprogram.

– Vi kan sjå attende på ein god, men intens haust. Ikkje alt har selt like bra som vi trudde, og det har til tider vore store arbeidsmengder i botn for å gjennomføra alle arrangementa, fortel Steen.

– Mykje av det vi gjer er kalkulerte risikoar, vi veit aldri heilt 100 prosent korleis publikum vil respondera på programmet vårt, fortel Halhjem. Samstundes er det viktig å understreka at det er heilt innarbeidd hos oss at vi skal favna breitt på uttrykk og opplevingar.

Steen fortel at knappe 30 personar løyste billett til konserten med folkemusikaren Susanne Lundeng førre fredag. Tilbakemeldingane frå publikum fortel uansett at for desse 30 blei dette eit høgdepunkt og ein intimkonsert å hugsa lenge.

– Då skal vi tola å ikkje selja ut kvar einaste arrangement, om vi samstundes skal by på noko for alle. Os er ikkje ein metropol, men når vi er så viss på å favna breitt, må vi sjølvsagt vega opp med publikumsmagnetar som mykje sel seg sjølv, legg Steen til.

Høgdepunkta denne hausten

Å få dei to til å vera samstemte om eit arrangement dei begge tykkjer var best, er umogeleg. I staden kjem ei lang liste med gode opplevingar;

– Claudia Scott, og samarbeidet med Er-An Vegkro og Am-Car klubben var veldig bra, seier Halhjem. Det er så kjekt å jobbe saman med slike gode aktørar som passar så godt i hop og saman stod bak haustens C&W arrangement.

– Det endå større Bjørnafjordmåltidet var jo eit eventyr, kjem det frå Steen.

– Spesielt kjekt er det korleis vi har lukkast å skapa ein ny arena her ute i foajeen, då spesielt med stand-up showa, mimrar Halhjem vidare.

– Og Carmen, og Tung Tids Tale med Riksteateret, og dei 3-400 borna som var innom og høyrte på nettopp Susanne Lundeng førre fredag, som ein del av Friskunst-prosjektet held dei fram.

Friskunst vart presentert i 2013, og er eit skuleprogram som kombinerer innhaldet frå det lokale kulturhuset og kulturskulen.

Skal setja julestemninga

I vekene fram mot jul kjem fleire av dei største publikumsmagnetane denne hausten. Fleire av desse er tydeleg med og set julestemninga i bygda.

– Håtta du! no på fredag, Fjøsnissen Borg tek farvel, Nordic Tenors og Fonos er alle populære arrangement, fortel Steen.

– Men skal vi koma med eit godt tips til kva du bør gå på, så vil vi trekka fram Lykkeliten-forestillinga til Rune Andersen, fortel Halhjem. Forestillinga har hausta strålande kritikkar frå eit samla pressekorps og publikum. Kritikkane fortel om ei ærleg, rystande, men samstundes humoristisk framsyning.

Slepp vårprogrammet på laurdag

Allereie på laurdag slepp Oseana programmet for våren 2019.

Dette skjer i foajeen, det er ope for alle, gratis julegraut og høve til å vinna billettar til utvalde arrangement i vårens program.

Midtsiden fekk ta ein titt i programmet, og ja, det vert noko for alle til våren òg.

Les òg: Hugsar du Håtta du?