Heftig fest for ungdomen

Bildeserie:

1 av 8

Det skorta ikkje på tilbod til ungdomen under laurdagens Ufest i Oseana Kunst & Kultursenter.

Workshops i beatboxing, breakdance, grafitti og seks timar med konsertar skulle samla ungdom frå heile regionen.

Nøgd direktør

Direktør ved Oseana, Ole Tobias Lindeberg var høgt og lågt heile laurdagen.

– Ungdomen er ei hard nøtt å knekka, innrømmer direktøren.

– Vi ønskjer verkeleg å nå ut til ungdomen, og vi har dei høgt på blokka til ei kvar tid. Det vert spanande å sjå korleis vi kjem ut etter denne dagen, men eg har eit genuint ønskje om at Oseana skal halda fram med slike arrangement. Oseana skal vera ein plass for ungdomen!

Nøgd og takksam arrangør

– Oseana var verkeleg ein pulserande arena for ungdom, seier prosjektansavarleg for Ufest, Agnes Smørholm.

– Det var kjekt å sjå så mange barn og ungdom som var innom Oseana i løpet av dagen. Workshops, som var nytt år, vart ein suksess med full aktivitet i heile huset.

Når det gjeld konsertbiten kunne Smørholm gjerne sett eit større publikum, men ho er likevel godt nøgd.

– Eg kunne sjølvsagt ønskt at det kom fleire til konsertane om kvelden, men alle som var der hadde det kjekt.

– Det er mange å takka for at Ufest 2018 vart såpass stort og profesjonell; Oseana, Os kommune og Os Rockeklubb saman med frivillege fortener ein stor takk, men mest av alt vil eg gje ein stor applaus til ungdomen som stod for alt frå planlegging til gjennomføring.

Nøgd ungdom på opplevelse og kos, 5200 Os

Smila og latteren sat laust hos dei ungdomane Midtsiden trefte under festivalen, og i foajeen fann vi ungdom horisontalt i sofaene.

– Det er utruleg kjekt å vera her, vi har vore på kule workshops tidlegare i dag, og no skal vi snart inn å dansa til Myra!

Myra fekk oppdraget med å runda av Ufest 2018. På førehand hadde seks andre band og artistar gjort sitt for å laga fest frå scenen i fire lange timar.

Midtvegs i konserten fekk det vesle, men entusiastiske publikummet høyra låta Myra har gjort saman med eksil-osing Maya Vik, nemleg singelen «Opplevelse og kos». Ein låt med tydlege referansar til Os.

At det heller var glissent med publikum på slutten kan ein vel kanskje tilskriva at festival skal vera litt slitsamt?

Kjekt var det uansett.