Heile 70 barn på friidrettens dag

Bildeserie:

1 av 3

For første gong arrangerte friidrettsgruppa i Os Turn friidrettens dag laurdag. Arrangementet var ope for alle i alderen 6-12 år som hadde lyst å prøve ei eller fleire øvelsar.

Dagen følgde opplegget som Noregs Friidrettsforbund har utarbeidd.

– Vi var veldig usikre på kor mange som ville dukke opp, men det viste seg at dette tydelegvis var eit populært tiltak. Heile 70 barn i alderen 6-12 år var innom på Kuventræ laurdag, fortel leiar i friidrettsgruppa Sverre Mowinckel-Nilsen.

Øvelsane dei fekk testa var 60 meter, høgde, kule, lengde og liten ball.

Mange talent

Samtlege deltakarar fekk gullmedalje for gode prestasjoner.

– Vi såg ei rekke talentfulle barn i aksjon. Både i kast-, hopp- og løpsøvelsane var det ei rekkje barn som oppnådde svært gode resultat. Vi kan faktisk kalle dei svært talentfulle.

– Tilbakemeldingane frå både foreldre og utøvarar var utdelt positive, fortel Mowinckel-Nilsen.

Friidrettsskule i sommarferien

Både utøvarar og trenarar frå friidrettsgruppa stilte som veileiarar og tilretteleggarar på dagen. På 60 meteren hadde arrangørane rigga det skikkeleg til, slik at utøvarane fekk oppleva å starta på skotet frå startpistolen og å få målt tida nøyaktig med tidtakersystemet.

– Det neste no er at vi i veke 25 inviterer til friidrettskule som eit alternativ til alle fotballskulene. Informasjon om dette blei delt ut til foreldra under arrangementet.

– Vi håper sjølvsagt at alle ungane hadde ein god oppleving på Kuventræ og at vi ser så mange som mogleg av dei igjen som medlemmar av friidrettsgruppa, avslutter friidrettsleiaren.