– Held meg ung og frisk
Eit av dei ivrigste medlemma i Bjørnefjorden Golfklubb er Margit Hellevang (80+). Fire-fem gongar i veka speler ho på banen.
Så fort det er lyst nok er Margit Hellevang ute på golfbanen på Hauge for å ta seg ein runde.
– Det viktigaste er naturen og den friske lufta, smiler den spreke dama i det ho gjer seg klar til å putta på hol 5.
– Margit er eit av dei ivrigste medlemmane vi har, og eit strålande eksempel på at golf er ein sport for alle, skyt dagleg leiar, Eivind Hodneland inn.
– Gymnastikk for heile kroppen
At ho har passert 80 er ikkje til å tru. Sprek som ein ungfole spring ho over fairwayen på jakt etter den vesle gule ballen. Golf byrja ho å spele då sonen drog ho med opp å drivingrangen for om lag fem og eit halvt år sidan.
– Du må gjera slik og slik. Slå denne og treffa der, forklarte han meg.
– Eg gjorde som han sa og han blei heilt mållaus. Det skulle ikkje vera mogleg meinte han, ler Margit, som nektar for at ho er eit naturtalent, men innrømmer at ho har drive med ballsport heile livet.
Dei første slaga gav meirsmak og no er ho ute på banen i alt slags vêr.
– Det er god gymnastikk for kroppen veit du.
– Eg er bombesikker på at det held meg ung og frisk.
Har banen for seg sjølv
Ei runde på ni hol held for den spreke dama. Gjerne åleine.
– Då kan eg nyta naturen og roen.
– I tillegg treng eg ikkje vera redd for dei andre ballane på banen.
Stort sett har ho banen for seg sjølv så tidleg på morgonen.
– Margit er så tidleg på banen at ho kjem inn igjen til klubbhuset om lag samstundes med at den neste går ut, fortel Eivind Hodneland.
Flotte forhold
Hellevang kan ikkje få skrytt nok av dei flotte spilletilhøva i vinter.
– I dag er det jo berre fantastisk. Då eg gjekk ut var det 7 varmegradar og bakken er faktisk litt mjuk òg.
– Eg liker ikkje når det er is på banen, men om det er litt hardt og rim som i går, så gjer ikkje det noko. Då sprett berre ballen litt lengre, smiler seniorgolfaren.
Turnering i helga
Hodneland er samd i at dei har vore heldig med vêret i vinter.
– Dei to siste åra har det jo vore skiløyper her på denne tida.
– Vi har fått ein flott start på jubileumsåret (klubben fyller 20 år i år, journ.mrk) med så fine tilhøve.
– Aldri har eg opplevd så stor oppslutning og så god stemning som det er i klubben no.
– Medlemmane er stadig i meg for å høyre om tilhøva og om det ikkje er turneringar på gang.
– Faktisk kjem vi til å arrangera proshopturnering allereie på laurdag, fortel Hodneland.
Speler på vintergreenar
For å spara greenane til sommaren nyttar ein eigne vintergreenar.
– Vi har blitt kjende for å vera ei bane i god stand om sommaren.
– Faktisk blir vi omtala som bane nummer to i Hordaland, etter Meland, og det vil vi freiste å halde på, så derfor må vi spara banen litt nå utanom vekstsesongen, avslutter Eivind Hodneland.
Spennande? Vil du ha ukas høgdepunkt i innboksen?
Les meir om
Last ned Midtsiden-appen idag
No kan du følgja nyhende frå Os - rett i appen.
- Gratis å lasta ned
- Bli varsla straks noko skjer
- Tilgjengeleg i App Store og Google Play Store
For å få tilgang til alle sakene i appen må du vera abonnent.