Held på formen – under tak

– Du går glipp av mosjonen, men held svingen ved like, seier Eivind Hodeland om systemet Full Swing Golf, som han kjører på to lerret i Bjørnefjorden Golfklubb sine lokale.

– Lengda er ganske lik òg, men du får stort sett betre score innandørs enn ute, seier Svein Arne Marceliussen.

Saman med Gjermund Engelsen er han blant dei mange som trener golf innandørs med fast frekvens gjennom vinteren.

– Du kan velja mellom 42 fine banar og krydra runden med å variera mellom ulike lysforhold og vêrtypar. Også vind kan leggast på, forklarar han.

Held på det sosiale

LHL Os, som har rundt 270 medlemmar, er eit aktivt lag med alt frå trim, bading i Osbadet, bowling hos Bowling1 og turar med Os Turlag på programmet.

Drygt 20 av medlemmane er aktive golfspelarar og dei fleste av desse tar også turen inn under tak når det er vintergreen og dårleg vêr.

– Vi er blant dei som set stor pris på å vera utandørs, og på mosjonen vi får ved å spela golf.

– Men å spela på simulator er betre enn ingenting og minst like sosialt, seier "golfsjefen" i LHL Os, Torleif Gundesø.

Måndag var knappe 20 av dei i simulatorane før dei hadde julemiddag i kafeen i klubblokalet.

Vil gjera golf meir kompakt

Sykkel, løping og andre mosjonsidrettar har dei siste åra gjeve golfsporten auka konkurranse. Fleire golfklubbar har gått litt ned i medlemstalet, det gjeld også på Hauge i Os.

– Vi har no rundt 650 medlemmar og medlemstalet har vore nokre hundre høgare før, seier Hodneland, som overtok som dagleg leiar etter Erk Just Olsen i vår.

– Golf tar tid, men det treng ikkje å ta ein halv dag og ein kan gjera mykje kjekt på golfbanen utan å vera så flink eller å bruka så mange timar på det, meiner Eivind.

Å stå å skyta frå driving-rangen, å gå færre hol - eller å "gå" nokre hol innandørs på simulatoren er blant eksempla han nemner.

– Det er to ting vil vil satsa spesielt på framover, oppfølgingskursog eigne konkurransar for dei som nyleg har tatt grømtkort og korte, kompakte spel for dei som berre vil bruka ein time eller to i slengen når dei speler golf.

I kombinasjon med bruk av simulatorane ser han spesielt for seg at det kan vera marknad for ein kombinasjon av aktivitet, møte og måltid.

– Simulatorane er opne for alle som vil prøva, ikkje berre for medlemmar.

– Julebord og seminar kan fint kombinerast med litt aktivitet og konkurranse, å gå ein realistisk runde under tak kan vera god lagbygging uansett nivå, seier Eivind Hodneland.