Heldt nullen mot Bergen Nord

Lysekloster spelte søndag heimekamp mot Bergen Nord, som rykte opp til 3. divisjon parallelt med Os i fjor haust.

– Eg synest det var stor forskjell på laga, men eg meiner òg at Bergen Nord såg gode nok ut til at dei bør klara å halda seg i divisjonen, seier Lysekloster-trenar Ruben Hetlevik.

Lysekloster - Bergen Nord 3-0 (1-0)
Målskårarar: Simen Næss, Karol Zielinski og Martin Pedersen.

Lysekloster opna svakt, men fann rytmen etter rundt ti minutt. Joachim Westrheim fekk tredd gjennom til Simen, som sette inn 1-0 i 28. minutt.

– Det var ein fantastisk pasning, skryter Hetlevik.

2-0 kom på innlegg i 58. minutt, 3-0 av Pedersen på corner to minutt etter at han kom innpå.

– Vi skapte nok til at eg meiner vi burde ha skåra fem mål i dag. Det gir sjølvtillit å sjå at ting fungerer betre og spelarane blir stadig tryggare på kvarandre.

– Samtidig ser eg at vi må stramma oss litt opp defensivt før kampen mot Fyllingsdalen.

Tett på toppen

Fyllingsdalen starta sesongen litt svakt, med tap i to av dei tre første, tilsvarande Lysekloster, som berre tok fire poeng på dei første fire kampane.

No ligg begge med 16 poeng, 2 poeng bak Vard Haugesund (éin kamp mindre) på 3. plass.

Kampen går på Varden laurdag. Neste heimekamp går mot Vestfossen, som ligg best an av dei tre laga under streken.

• Terminliste og tabell