Her har makken gått berserk
I dag starta arbeidet med å skifta 60 pålar på brygga ved Vindu mot Fjorden.
Bildeserie:
Første juledag i fjor blei delar av brygga ved Vindu mot Fjorden i Hamnevegen stengt grunna skade.
Inspeksjon av dykkarar frå Os brann- og redningsteneste viste at pålane på brygga er rotne.
Vinter og vår gjekk bokstavleg med til diskusjonar mellom entreprenør av den åtte år gamle brygga og eigar, Os kommune, og i juni blei det bestemt at dei to spleiser på reparasjonen, som vil koma på om lag 650.000 kroner.
I dag starta arbeidet på den skadde delen, men også pålane på resten av brygga skal skiftast.
Held fram ut august
– Vi vil løfta den skadde brygga og skifta pålane der først, fortel Jarle Øvreeide frå Os Kaiservice AS.
Det er til saman 60 pålar som skal skiftast.
– Seinare vil vi stenga andre delar av brygga, innover mot Oselvarnaustet, og skifta pålane der òg. Det blir litt arbeid for dykkarar, men det er ikkje meir enn 1,5 til 2 meter djupt.
Arbeidet skal vera ferdig innan utgangen av august.