Hjelle veks i Fusa

Hausten 2008, etter 24 år med butikk på Os, la Malermester Alf Hjelle & Sønn AS ned butikken i Landboden. Å satsa for fullt i Fusa har ikkje vore noko bakdel.

- Butikken i Eikelandsosen held til i eit senter i vekst, samla auka butikkane i Fjord´n Senter omsetnaden med 12 prosent i fjor, butikken vår auka med 30 prosent frå året før, fortel Anders Hjelle.

Like mykje malaroppdrag
Hjelle har åtte handverkarar i sving, dei fleste av dei frå Os. At butikken i heimkommunen blei lagt ned har ifølgje Hjelle ikkje hatt noko å seia på oppdragsmengda.

- Vi har heldt oppe aktiviteten i Os samstundes som vi har bra med jobbar i Fusa. Bergen er uansett viktigaste marknaden vår når det gjeld handverktenestene.


Ekspert i ny kjede
Hjelle, som frå før var med i kjeden Mesterfarge, er no del av den nye kjeden Kulør.

- Mesterfarge og Farveglede er slått saman. Med rundt 45 butikkar i Mesterfarge og 35 frå Farveglede er den nye kjeden no nesten på høgde med dei største kjedane i Noreg.

- I tillegg er over 200 male- og handverksbedrifter medlem, noko som er med på å auka volumet på innkjøpa, noko som igjen påverkar prisane våre.

På nett skal Kulør også tilby gratis ekspert-tips til kundane, der Anders Hjelle er ein av fire ekspertar.

- Vi fire har kvar våre ansvarsområde, eg skal svara på spørsmål om maling utandørs. Førebels er det lite som skjer ute, men våren og sommaren blir nok travel, trur Anders.