Høg fart og førarkortbeslag
Laserkontroll i Hegglandsdalen og førarkortbeslag etter trafikkulykka på E39 i går.
I går formiddag gjennomførte politiet ein laserkontroll i Hegglandsdalen, like ved barnehagen.
Politibetjent ved Os lensmannskontor, Sindre Hallem fortel at det mellom klokka 9.45 og 11.45 vart reagert på seks ulike tilhøve av høg fart.
Høgaste fart vart målt til 73 kilometer i timen.
Hallem fortel at fartsgrensa på staden er 50 kilometer i timen, og at føraren som vart målt til 73 kilometer i timen drog på seg to prikkar på førarkortet, i tillegg til eit forenkla førelegg på 8.500 kroner.
Beslag i førarkortet
I går ettermiddag var det ei trafikkulykke på E39 på Søfteland.
Ein bil skal ha treft fjellveggen, og føraren av bilen vart teken til legevakt etter ulykka.
I dag fortel Hallem at føraren kom frå ulykka utan skader, men at det er teke beslag i førarkortet og det er oppretta sak. Dette fordi det skal vera mistanke om at bilføraren sovna bak rattet.