Bildeserie:
Det er ikkje berre fotballfolket som nyttar dei første dagane av sommarferien til å trena litt ekstra gjennom fotballskuler rundt om i kommunen. På Kuventræ har også cheerleadarane hatt sin treningsleir dei tre første feriedagane.
– Det er andre året vi arrangerar Cheercamp i Oshallen.
– I år er det 47 deltakarar.
– Ekstra kjekt er det å sjå at vi har med 12 heilt nye, pluss nokre som var med i starten, men som no har kome tilbake.
– Deltakarane har vore flinke. Dei har mykje energi og har lært seg mykje desse dagane, fortel headcoach i CheeriOs, Mia Elnes.
Avslutta med konkurranse
Dei tre dagane med øving blei onsdag avslutta med ei konkurranse, kor dei eldste cheerleadarane blei delt inn i to lag som skulle vise stunta dei har lært.
– Dommarane ser på kreativiteten i showet, korleis dei utførar stuntsa, om dei gjer feil og kva utstråling og spirit dei viser.
– Du veit ein cheerleadar skal vera like sliten i smilemuskelen som i dei andre muskla i kroppen etter ei oppvisning, forklarar Elnes.
Det blei både høge kast og spretne hopp på matta når cheerleadarane holdt showa sine.
Til USA på treningsleir
Sjølv flyttar Elnes tilbake til heimlandet USA i sommar, men først skal ho arrangera treningsleir for nokre av medlemma i CheeriOs.
– Vi reiser med tre trenarar og sju utøverar til North Carolina State University kor dei skal trena med deira cheerleadarar og trenarar.
– Det trur eg skal bli veldig kjekt.
– Sjølv om eg no flyttar, så håpar eg dei klarar å halde spiriten oppe.
– Eg kjem til å komma tilbake til Os neste sommar for å vera med på campen då. Kanskje klarar eg å få med meg nokre trenarar frå USA også, avsluttar Elnes med eit smil.