Sport | 07. jan. 2018

– I dag var det gøy

Osdamene hang godt med serieleiaren. – I dag hadde vi fortent poeng, meiner Trond Førde Eriksen.

– I dag var det gøy
Osdamene sto saman som eit lag då dei nesten klarte å ta poeng mot serieleiaren (arkivfoto: KVB)
Andris Hamresøndag 07. jan. 2018 15:52

Os starta vårsesongen på bortebane mot serieleiar Gneist søndag. Dei to laga møttest også like før jul. Då blei Os hengande etter og måtte sjå at gjestane stakk av med sigeren 24-36.

– Eg tykkjer vi spelte ok mot dei også i den kampen, men då hadde Gneist verkeleg dagen. Kampen i dag var mange hakk opp, oppsummerer Ostrenar Trond Førde Eriksen.

Etter ein heller svak desember har spelarane og trenarteamet satt seg samen og fått lufta ut. Det fekk dei att for i søndagens kamp. Etter fem minutt sto det 3-3, før vertane rykka frå og gjekk opp i 6-3 i løpet av dei neste fem minutta. Det fekk Ostrenar Trond Førde Eriksen til å ta time-out, noko som tydelegvis hjalp. Os beit seg fast og gjekk til pause berre fire mål bak.

Gneist - Os 23-21 (13-9)

Utv: Gneist: 2x2 min, Os: 2x2 min

Os sitt lag: Marlene Sund, Emilie Halhjem 3, Hilde Kristine Røttingen, Liv Pauline Lunde 2, Line Hjelle Berntsen 7, Tiril Grønvigh, Elise Hjelle 2, Irmelin Lund, Thiet Dang 2, Marie Henriksen Håland 2, Nora Berge 1, Emma Sælen Lyssand, Frida Sælen Lyssand, Mia Torp Nielsen 2.

Sjå tabell

Andre omgangen starta med at Liv Pauline Lunde reduserte for Os, før ho berre minutta seinare måtte setta seg på benken i to minutt. Trass utvisninga reduserte Os ytterlegare to ganger, medan Gneist skåar berre ein gang frå straffemerket.

Var heilt oppe i ryggen

Etter ti minutt var stillinga 14-13 og gjestane fekk trua, men i staden rykka Gneist igjen litt frå.

– Dei har ein veldig god spelar i Emma Johannesen Haugstvedt, som skårar viktige mål for dei. Ho er ikkje lett å få tak på.

– Trass i at det blei tap, så er eg veldig nøgd med korleis vi framsto i dag. I dag sto jentene saman som eit lag. Vi var tilbake der vi var i byrjinga av sesongen, så det var veldig gøy, sjølv om det ikkje gjekk heilt inn.

– Dette er heilt klart noko vi kan byggje vidare på. Speler vi slik i resten av sesongen, så skal vi klare å plukke nok poeng til å halde oss i divisjonen. Ligaen er god, men legg vi ned den innsatsen her kvar gang, så skal vi kunne hamle opp med kven som helst. Det er berre opp til jentene, avslutter Førde Eriksen.

Allereie neste søndag får ein svaret når Åsane, som Os også tapte stort mot før jul, kjem til Oshallen.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.