Nokre av deltakarane på skattejakta i 2017. (Foto: Lysøens Venner)

I fjor blei det dobla deltaking - no er det klart for ny skattejakt

230 turgåarar deltok på skattejakt på Lysøen i fjor. Laurdag er det ekstra spennande langs turstiane på øya igjen.

Av: Kjetil Vasby Bruarøy

Lysøens Venner, ei gruppe frivillige som har engasjert seg for museet som Ole Bulls villa er del av, har etablert ein ny, populært aktivitet på øya.

– I 2016 hadde vi rundt 120 deltakarar, i fjor kom heile 230 ungar og vaksne som ville delta på skattejakta vår, fortel styreleiar Bjørn Laastad.

Arrangementet er gratis, berre båtturen over til øya kostar pengar, og arrangørane deler ut is til alle som finn skattane.

– Årsaka til at vi arrangerer dette er fordi vi vil at fleire skal bli kjent med det fine nettet av turstiar på øya.

På den 700 mål store øya er det to vatn, ein 76 moh høg topp med utsiktstårn, badeviker og 13 km med fine, skjelsandbelagte stiar.

Passeleg løype - også for dei yngste

Det er ikkje meininga at ungane skal gå 13 kilometer i løpet av skattejakta.

– Sjørøvarane som har vore på Lysøen, men som blei oppdaga og sprang til skipet sitt og stakk av, har mista mange skattar. Men skattane ligg ikkje så veldig langt frå villaen, dei fleste bruker berre rundt ein god time ute i terrenget.

– Korleis er det å ta imot 230 gjestar og senda dei ut i turløypene?

– Det er minst dobbelt så mange som deltar i Lysøen Rundt om våren, så det går heilt fint. Gjestane kjem i puljer, cirka 40 og 40 med båt, så det går heilt fint.

 

 

Fleire saker