I forhandlingar

Fredag 16. oktober gjekk anbodsrunden ut. Alle dei fire prekvalifiserte entreprenørane, Mesta Yrkesbygg, Strand, Betonmast og Veidekke, leverte tilbod innan fristen.

- Tysdag i førre veke hadde vi møte med arkitektane frå kvart selskap, kvar for seg, der dei forklarte tilboda sine meir detaljert. No forhandlar vi vidare med kvar av dei fire, seier brannsjef Stein Gjøsund.

Stasjon, legevakt og arkiv
Før prosjektet blei sendt på anbod blei det forma ein plan over kva entreprenørane skulle rekna på, frå romplan til liste over fasilitetar og tekniske krav.

På den om lag 10 mål store tomta skal det koma ny brannstasjon på drøye 2200 kvadratmeter, lokale til sivilforsvaret på rundt 200 kvm, legevakt på 150-200 kvm og fjernarkiv for Os kommune på 300 kvm.

Stasjonen skal også få landingsplass for helikopter.

Byggestart på nyåret
Forhandlingane med tilbodsgjevarane kjem til å halda fram i nokre veker. Etter planen skal saka opp for formannskapet 8. desember og kommunestyret 15. desember.

- Det har vore ein milepæl å motta desse tilboda, og det er mange fine løysingar blant dei fire, seier brannsjefen.

Blir den politiske handsaminga ferdig før jul, står det igjen ein runde med rammeløyve og byggesøknad på nyåret. Brannsjefen håper på første spadetak tidleg i 2010.