I gråsona

Onsdag hadde Statens vegvesen trafikkontroll på E39 i Hjellemarka. Frå klokka 10.30 til 16 blei ti bilar avskilta.

– Alle var personbilar. Då vi var ferdige såg vi at det tilfeldigvis var sånn at ni av dei var grå, fortel Lars Harald Drange frå vegvesenet.

– Seks av dei blei avskilta grunna manglande EU-kontroll. Nokre av dei hadde gløymt det, andre hadde utsett kontrollen.

På vegvesen.no kan du sjekka kor tid din bil skal vera EU-godkjent neste gong.

Ingen utan bilbelte - fleire med sota vindauge

Hovudfokus onsdag var dokument, og fotobilen med kjennemerke-gjenkjenning var i bruk.

– Men vi sjekka også bilbelte, dekk og noko teknisk, fortel Drange.

Ingen blei tatt utan bilbelte, eller med dårlege dekk, men fleire hadde feil og manglar då det kom til lys og sikt.

– Vi stoppa nokre bilar med berre eitt lys, og ein del med mørk film på sidevindauga framme, så vi skreiv ut nokre mangellappar.