I nye klasserom

Elevar på Os skule får undervising i bibliotek og musikkrom etter at ein bygning blei stengt grunna sopp.

Kjetil Vasby Bruarøytirsdag 19. mai 2009 12:42

- Torsdag fekk eg rapporten, fredag hadde eg møte med rektor på Os skule, fortel eigedomsforvaltar Kari Fjeldstad.

Grunna mistanke om dårleg inneklima i den eine bygningen bestilte Fjeldstad ei analyse. Rapporten viste soppskadar i kjellar, og eigedomsforvaltaren bestemte saman med rektor at dei skulle flytta dei 56 førsteklassingane på skulen ut av bygningen til skaden var utbetra.

- Elevane flytta ut allereie fredag. Biblioteket og musikkrommet på skulen er no tatt i bruk til undervising, og slik blir det fram til sommarferien. Vi håpar å ha den gamle bygningen ferdig utbetra til skulestart til hausten.

- Er det bestilt tilsvarande rapport på andre bygg som skulen brukar?

- Nei, vi har ikkje fått melding om plagar frå dei som brukar andre bygningar. Men det har vore stilt spørsmål til bygningen skulefritidsordninga bruker. Her skal vi straks til med oppsussing, blant anna skal eit golv skiftast ut, fortel Kari Fjeldstad.

Retting:
Då midtsiden.no omtalte saka i går, skreiv vi at skulen fekk tre dagar på seg til å flytta ut, og at bygningen framleis var i bruk. Det er ikkje rett. Skuleleiinga valte sjølv å flytta ut, og dette skjedde altså allereie fredag.