I Olsenbanden-musikal

- Å synga i Grieghallen med Forsvarets musikkorps i ryggen blir stort, eg trur ikkje dei veit kva som ventar dei, seier musikklærar Terje Neset.

Kjetil Vasby Bruarøyonsdag 10. feb. 2010 09:45

Olsenbanden jr. for full musikk er tittelen på den musikalske familieframsyninga mange osingar er involverte i. Sundag skal eit barnekor som består av 20 ungar frå 3. til 9. klasse på scenen i Peer Gynt-salen i Grieghallen saman med blant anna Forsvarets musikkorps Vestlandet og Cheezy Keys-medlemmar, som har hovudrollene i musikalen.

- Vi har hatt liknande samarbeid med barnekor frå Os før, blant anna Astrid Lindgren-opplegget vi hadde under Osøren Blues 6 Jazzfestival i fjor sommar, seier Geir Mildestveit.

Geir er saman med kona Bente tilsett i FMKV, der dei to spelar klarinett og obo. No ser dei fram til å akkompagnera barnekor frå heimbygda.

- Krevjande og kjekt
Anne Leni Sæbø og Terje Neset styrer barnekoret frå Os. Øvingane starta i desember, der dei også brukte romjula til å terpa på Olsenbanden-låtane.

- Det er veldig kjekt å ha slike framsyningar å øva mot, og spesielt positivt for ungane å vera med på eit så profesjonelt opplegg, seier Terje.

- Samstundes er låtane krevjande, med trestemt song å enkelte parti, og koreografi som må øvast inn for at koret skal passa inn i handlinga.

Éi framsyning
Koret frå Os og FMKV får med seg Stord kulturskulekor, Aspane og vokalistar og skodespelarar frå Oslo til dei to framsyningane i Hordaland. Utanom Grieghallen klokka 16 førstkomande sundag er det berre Bømlo kulturhus som får besøk av Olsenbanden-musikalen.

I tillegg til kor og korps er det fleire med lokal tilknyting, regissør Kjærand Moe er frå Bømlo og manustilretteleggar, Arne Lindtner Næss er frå Bergen.

Framsyninga er blitt til i eit samarbeid mellom Nordisk film og Forsvarets musikk.