I rekordform før VM

Sverre Lunde Pedersen og resten av landslaget er i Canada for å førebu seg til VM allround, som startar til helga.

Laurdag viste dei norske skøyteløparane knallform då dei deltok i Time Trials på VM-arenaen.

Nær ny verdsrekord

Sverre Lunde Pedersen gjekk ein lynrask 3000 meter og vann med tida 3.37,37, som er 0,09 frå Eskil Ervik sin nesten 10 år gamle verdsrekord.

Med det skjerpa Sverre sin tre år gamle personlege rekord med 0,21 sekund.

Russiske Dennis Yuskov kom på 2. plass, belgiske Bart Swings på tredje. Håvard Bøkko kom på 6. plass av 19 deltakarar.

Sverre sette også ny pers på 500 meter, der han gjekk inn til 12. plass på tida 36,35. Den førre rekorden hans blei sett på same is i 2011 og var på 36,56.

Også Simen Spieler Nilsen (35,72) og Håvard Bøkko (35,75) sette nye personlege rekordar på 500 meter, og Ida Njåtun sette ny norsk rekord med 1.15,07 på 1000 meter.

På NRK til helga

NRK2 sender frå Calgary laurdag kveld frå klokka 20. Sverre sin 5000 meter kan du sjå frå klokka 22.45.

Søndag viser NRK1 høgdepunkt frå laurdagen klokka 17 og direkte på NRK2 1500 meter frå klokka 18.55 og 10.000-meteren frå klokka 20.50.