– Ikkje alt blir kasta
Espira Kuventræ har rydda boss langs Industrivegen. I dag blei noko kasta, men ein del er spart for å bli kunst til Solsikkefestivalen.
– Det var mykje boss og vi fann mykje forskjellig, fortel femåringane som i dag var på BiR sin gjenvinningsstasjon i Kolskogen for å kasta.
Ungane er frå avdelinga Snusmumrikken i Espira Kuventræ barnehage og har rydda boss langs Industrivegen frå krysset ved Bohus og bort til Os vidaregåande skule.
– Vi fann papir, isopor og colakorkar.
Omvising og kasting
Vegen var kort då ungane saman med to vaksne, Silje Beate Olsen og Hildegunn Sperrevik, i dag skulle kasta bosset på genvinningsstasjonen.
Dei fylte trillebåra og spaserte til BiR.
– Her har vi fått omvising, ein runde som var like interessant for oss vaksne som for ungane, fortel Slje.
Festival med gjenvunne boss
Men ikkje alt frå bossryddinga blei kasta, noko skal bli kunst.
– Vi har eit prosjekt på gang i heile barnehagen der vi tar vare på ein del av det vi finn og prøver å laga noko fint av det.
– Torsdag 24. mai skal vi ha Solsikkefestivalen, der vi inviterer foreldre på fest og utstilling med kunst og solsikker, seier Hildegunn.
Varene er for sal og omsetnaden går til SOS Barnebyer.