Ikkje berre enkelt

Etter å ha vore vitne til mang eit arrangement det siste året slår det meg at dei har ei tøff oppgåve dei som anten på heilt frivillig basis tek på seg å skapa liv i bygda (som Osøren Jazz & Bluesfestival, 60 grader Nord, Musikkforeninga) eller Oseana som på meir profesjonelt grunnlag gjer det same.

Ein fellesnemnar eg tykkjer eg ser på desse små og store arrangementa er at arrangørane jammen skal ha ein stor posjon is i magen.

Er osingene igjen berre treige med å kjøpe billettar eller har vi bomma på artistar og opplegg, trur eg er eit spørsmål arrangørane stiller seg titt og ofte.

Seinest opplevde eg det no i helga då Oseana inviterte til sommarshow med tre av landet unge komikarar.

Fredag morgon hadde dei berre seld 38 billettar og frykta ei flau oppleving i foajeen på kulturhuset. Då klokka bikka tolv laurdag var dei 150 billettane praktisk talt vekke og frykta gjekk over frå å vera redd for tom sal til å skulle måtte avvisa folk i døra.

Kan bli dårlegare tilbod

Før det hadde Oseana vald å avlyse to av dei tre framsyningane dei hadde satt opp av sommarshowet. Eit show som har gått 14 dagar med utselde hus i Mandal.

- Hadde det gått som opprinneleg planlagt hadde vi klart å tene pengar på sommarshowet, no tapar vi i staden på det, fortalde arrangementssjef Berit Steen medan komikarane leverte eit forrykande show.

Og nettopp der ligg problemet.

Om du og eg er treige med å kjøpe billettar til arrangement og show vi kan tenke oss å sjå, anten det er musikkforeninga eller Oseana som inviterar, så risikerer vi at tilbodet etterkvart blir dårlegare og i verste fall forsvinn.

Det var neppe det som var tanken då kulturhuset blei opna for drøyt eit år sidan.

Eg veit at vi har mykje spennande i vente i løpet av hausten. Ikkje berre av store namn, men òg av lokale krefter og litt smalare sjangrar.

Skal vi framleis få gleden av denne variasjonen er det viktig at vi viser arrangørane at vi set pris på det dei gjer. Den beste måten vi kan gjera det på er å gje dei tryggleiken ved å kjøpe billettar i god tid før arrangementet.

Andris Hamre
journalist, Midtsiden.no