– Ikkje lett å lima husa saman
Det ligg mykje hardt arbeid bak den flotte peparkakebyen til sjuandeklassingane ved Søre Neset skule.
Bildeserie:
Det har vore travle førjulsveker på dei 48 elevane ved det sjuande trinnet på Søre Neset. Dei siste vekene har dei jobba med å laga sin eigen pepakakeby, og sidan i haust har dei hatt eit stort prosjekt om Kon Tiki.
Torsdag kunne dei visa fram begge prosjekta sine.
Gøy, men utfordrande
- Elevane har laga alt sjølv, dei har vore veldig flinke, fortel kontaktlærar Kristine Olsen Samdal, som er tydeleg stolt over kva elevane har fått til.
Sjuandeklassingane Andrine Fløysand, Thea-Marie Skjerping og Charlotte Pettersen var alle einig om at dei synast begge prosjekta var gøy.
- Men det var ei utfordring med peparkakehusa.
- Det var ikkje så lett å få husa til å henga saman, heime er det mamma som gjer den jobben medan eg pyntar, fortel Charlotte.
Ein flott by har dei laga uansett, og med dempa belysning og julelys var den rette stemninga sett.
- Det har vore mykje jobbing, men vi vil veldig gjerne gjera det igjen, seier jentene.
Lærte om Kon-Tiki
Sidan i haust har elevane hatt eit anna prosjekt der dei har lært om Kon-Tiki.
Kon-Tiki var balsaflåten Thor Heyerdahl brukte for å bevisa at det var moleg å koma seg frå Sør Amerika til Polynesia på ei primitiv flåte.
- Elevane har lært mykje om Kon-Tiki, vi har mellom anna vore og sett Kon-Tiki filmen på kino, fortel Olsen Samdal.
Samtidig med opninga av peparkakebyen hadde dei også ei eiga utstilling med Kon-Tiki flåtar.
- Det var meininga å laga flåtene på same måte som Heyerdahl gjorde i si tid, men det blei for vanskeleg og vi måtte ty til superlim, ler læraren.
- Ja det var lettare å laga flåtar enn peparkakehus, for det var lettare med superlim, fortel jentene på sjuandetrinnet.
Etter travle veker kan elevane no vera stolte av det dei har fått til og ta juleferie med godt samvit.