Ikkje open brannstasjon i år
Brannvernveka 2012: I år blir det ingen open brannstasjon, men likevel fokus på brannforebygging. - Vi ventar til nyestasjonen er ferdig, seier Anne Kjersti Storebø.
Denne veka arrangerer brannstasjonar over heile landet brannvernveka, som tradisjonelt blir avslutta med open brannstasjon på laurdagen.
- Vi har i år vald å ikkje ha open brannstasjon, men i staden venta til den nye brannstasjonen på Moberg står ferdig.
- Då skal vi invitera osingane på besøk, lovar Anne Kjersti Storebø, leiar for forebyggjande avdeling ved Os Brann- og Redningsvesen.
Storebø ser fram til å få visa fram den nye stasjonen og ikkje minst få mykje betre plass til aktivitetar i trygge omgjevnader.
- Det har vore litt med hjarte i halsen å ha arrangementet her i sentrum med ein trafikkert veg rett framfor.
Har du lyst til å vitja ein brannstasjon laurdag held hovudbrannstasjonen i Bergen open dag også for osingar.
9 av 10 har ikkje avtalt møteplass
Fokuset i årets brannvernveke er å halde brannøvingar både i bedriftar, skular, barnehagar og ikkje minst heime. Ei fersk undersøking syner at 9 av 10 nordmenn ikkje har avtalt med sine næraste kor ein skal møtast om det byrjar brenna.
- Det er skremmande at så få har avtalt ein trygg møtestad utanfor bustaden. Ved brann er det lett å koma bort frå kvarandre i kaoset som oppstår. Vårt skrekksenario er at folk spring tilbake inn i brennande hus for å leite etter familiemedlemmar som har kome seg ut andre vegar, seier konserndirektør Line Hestvik i IF Skadeforsikring.
- Hold brannøving
Undersøkinga, som er gjort for Brannvernveka av TNS Gallup syner at barnefamiliar er noko flinkare enn andre. 16 prosent av familiar med barn har gjort avtale om utandørs møtestad i tilfelle brann.
- Aller flinkast er dei som faktisk gjennomfører brannøvingar i eigen heim.
- Av desse er det nesten halvparten som har ein fast møteplass utafor bustaden. Dette viser kor viktig det er å øve også heime.
- Barna har brannøvingar i barnehagane og på skulane. Dei vaksne har jamnlege øvingar på jobb, men det er heime vi oppheld oss meste av døgnet, og det er der brannfaren er desidert størst. Difor burde det vera opplagt at vi har brannøvingar heime òg, avsluttar Anne Kjersti Storebø.