- Ikkje stans i undervisninga
Sjølv om undervisningslokala i Oseana må stengja, reknar kommunalsjef Geir Engelsen med at undervisninga går som normalt.
Torsdag blei det kjend at Arbeidstilsynet stanser bruken av Os kulturskule sine lokalar på Oseana Kunst- og Kultursenter. Stenginga gjeld frå måndag 24. september, ikkje førstkommande mandag som Midtsiden skreiv i går.
- Stenginga gjeld dei fire undervisningslokala og Vargasalen, når denne nyttast til undervisning.
- All anna drift på Oseana vil gå som normalt, forsikrar Engelsen som er prosjektleiar for kommunen si gruppe som ser på korleis ein skal løysa Arbeidstilsynet sine pålegg.
Allereie på Varafjell
Kultursjef Lisbeth Axelsen og leiinga ved Os Kulturskule har heilt sidan kommunen anka Arbeidstilsynet Vest sitt vedtak inn for Direktoratet for Arbeidstilsynet sett på moglege scenariar og løysingar om direktoratet holdt fast på vedtaket frå Arbeidstilsynet.
- Det var allereie i vinter vi anka saka inn til direktoratet. Medan vi har venta på svar frå dei har vi nytta tida til å sjå på moglege løysingar både som mellombelse løysingar og i høve til permanente løysingar litt fram i tid.
- Den mest nærliggande mellombelse løysinga er å ta i bruk lokala på Varafjell som no er ledige etter at teknisk drift har flytta ut.
- Kulturskulen har allereie noko undervisning der oppe frå før, fortel Engelsen.
Endeleg avgjer om kva undervisning som kjem kor vil bli teken i løpet av kommande veke.
- Vi kjem til å annonsera dette i Os og Fusaposten og på Midtsiden i tillegg til på kommunen si eiga heimeside, seier Engelsen.
Tenkjer også logistikk
Administrasjonen arbeider no med å sy saman dei mellombelse løysingane for undervisninga i Kulturskulen.
- Vi ønskjer å nytte lokaler kommunen allereie har eit eigerforhold til, men samstundes legg vi òg logistiske hensyn til grunn slik at ikkje elevane må fraktast urimeleg langt.
- Dei mellombelse løysingane skal ikkje kosta kommunen vesentleg ekstra.
Politikarane som avgjer
Det som derimot kjem til å kosta er dei permanente løysingane, om ein vel å gjera endringar i lokala i Oseana.
- Prosjektgruppa som skal følgje opp arbeidstilsynet sine pålegg jobbar fram mot kommunestyret 30. oktober.
- Då vil politikarane få presentert fleire alternative løysingar frå store bygningsmessige grep på Oseana til bruk av alternative lokaler.
- Kva som skal velgjast blir til syvende og sist ei politisk avgjerd, seier Engelsen.