Imponerande kunnskap

Bildeserie:

Full skjerm

1 av 10

Gjennom vinteren og våren har de to skulane kvar for seg arrangert kunnskapskonkurranser for 5., 6. og 7. trinnet. Elevar frå dei tre klassetrinna har blitt satt saman i lag på tvers av klassane og konkurrert med kvarandre i kunnskap om alt mellom himmel og jord.

Fredag møttes dei to vinnarlaga til ein superfinale med entusiastiske tilrop frå skulane sine.

- Dette er ein historisk dag. For første gang skal dei to skulane konkurrere med kvarandre, fortalte, for anledningen ein smokingkledd konfransier, Geir Bjørkhaug.

Saman med mellomanna inspektør ved Kuventræ Kjetil Gulbrandsøy hadde inspektøren frå Os barneskule laga oppgåvene dei to laga skulle få bryna seg på.

- Det har vore omtrent ei like stor utfordring, smilte Gulbrandsøy undervegs i konkurransa.

Eit viktig poeng var at oppgåvene måtte vera så visuelle at medelevane i salen også fekk dei med seg.

Tok dei i sløyden

Oppgåvene gjekk frå spørsmål for ein kvar smak via kva heiter desse byggverka til barnesongar, matematikk, musikk og anatomi til meir handfaste fag som å snikra eit hagegjerde.

Dei to laga bytta på å ligga i leiinga. Først Os eitt poeng framfor Kuventræ, så Kuventræ framfor Os.

Då dei to laga fekk oppgåva med å snikra hagegjerde viste Kuventræ elevane at dei kunne det å svinga hammaren og drog i frå.

Æresgjestar på Vil-Vite

Etter 9 runder med oppgåver av ymse slag kunne til slutt Kuventræ jubla for sigeren tre poeng framfor Os.

- De har båe vist ein imponerande kunnskap og innsats. Det er nesten litt stygt av oss å ta heim sigeren når de inviterar oss ned hit, helsa rektor ved Kuventræ Per Olav Sørås då sigeren var eit faktum.

Trøysten får vera at båe dei to finalelaga blei invitert til opninga av dinosaurutstillinga på Vil-Vitesenteret i sluten av mai.

- Der vil de vera heidersgjestar alle saman, fortalde Bjørkhaug.

Som vinnarar fekk Kuventræ i tillegg diplom og t-skjorte.