Imponerte i Inzell

Skøyteeliten er samla i Inzell i Tyskland og Sverre Lunde Pedersen imponerer stort.

På 1000-meteren sette han laurdag ny personleg rekord med tida 1.09.71, nær eitt sekund betre enn den gamle personlege rekorden. Tida held til ein 5. plass mot sterk internasjonal konkurranse i løpet, 0.51 bak nederlandske Kai Verbij.

Vann 5000-meteren

I tillegg til 1000 meter gjekk Lunde Pedersen 5000 meter og imponerte om mogleg endå meir.

Han brukte 6.22.31 på dei fem kilometrane, med rundetidar stort sett på 30,4.

Lunde Pedersen vann framfor Jan Blokhuijsen frå Nederland med nær to sekund og Bart Swings frå Belgia med 2.45.

– Ein god start på sesongen, melder Lunde Pedersen sjølv på twitter.

Trenaren jublar

Trenar Sondre Skarli jublar over Lunde Pedersen sine løp.

– 1000 meteren var hans livs desidert beste mellomdistanseløp. Held han fram slik skal dei få slita veldig med han på 1500 meter denne sesongen. Han har no fått mykje fart og det er det han har mangla mest tidlegare. Normalt sett er 1000 meter ein distanse Sverre ikkje går fordi den er for kort for han.