Innfører ikkje forbod enno

NRK Hordaland melder tysdag formiddag at fleire kommuner i Hordaland no har innført forbod mot bruk av open eld. Det vil ikkje brannsjef Stein Gjøsund gjera, enno.

– Eit slik forbod skal vera eit formelt vedtak etter brannlova.

– Eg meiner at det skal henge høgt før vi fattar, men samstundes må folk vera aktsame, seier brannsjefen.

Om det ikkje kjem regn til helga vil brannsjefen gjera ei ny vurdering til veka.

Skal risikovurderast

Gjøsund fortel at dei har fått nokre telefonar frå skuler og barnehager som har tenkt seg på tur i det fine vêret og som har lyst til å gjera opp eld.

– Svaret har så langt vore at dei må gjera ei reell risikovurdering av aktiviteten.

– Kor langt unna bålplassen er det årsgamle tørrgraset, har ein sløkkemiddel i umiddelbar nærleik, bør ein forby ungane og andre å rota i bålet med stokkar slik at gnister kan fyka, er døme på spørsmål ein bør stilla seg i følgje brannsjefen.

Gjøsund minner òg om det automatiske bålforbodet i skog og mark som tek til 15. april.

Hagebål greitt

Hagebål er tillete heile året, men også her ber brannsjefen folk tenkja seg om.

– Ein lyt nytta sunn fornuft.

– Eit lite hagebål er ikkje råka av det generelle bålforbodet, men kan vera omfatta av forureiningslova.

– Om røyken plagar og forureinar for naboane, kan også dette vera forbode, forklarar Gjøsund, som ber folk gjera ei risikovurdering også når dei skal gjera opp hagebål.

Avstand til bygningar, vindretning og sløkkeutstyr er ting ein bør tenkje på.

– Er ein i tvil er det berre å ringa oss på vakttelefonen, 915 68 590, så skal vi rådgje så godt vi kan.

Er førebudd

Sjølv om han ikkje vil leggja ned forbod mot ope eld, er brannsjefen og mannskapa førebudd på gras- og lyngbrannar.

– Vi har utstyrt bilane med sløkkeutstyr for skog og grasbrannar.

– I tillegg har vi hatt ein gjennomgang med mannskapa slik at dei er førebudd, avsluttar Gjøsund, som håper dei slepp nytta kunnskapen.