Inspirert av Napoleon
Orbo er tilbake på engelsk og haustar ros og rause terningkast for EP-en «Man O' War». Coveret er teikna av ein spansk elev av Picasso.
Bildeserie:
I fjor debuterte Orbo på norsk med albumet «Steingard», for ei god veke sidan hadde han releasekonsert for EP-en «Man O' War».
– Det blei sleppefest på Madam Felle følgt opp av ein miniturné på Austlandet. Det var mykje folk og god stemning på alle konsertane, fortel Ole Reinert Berg-Olsen.
I Drammen spelte han på Buddy Scene, i Oslo på Buckleys. Orbo hadde med seg eks-Longshots Reidar Opdal på piano, osingen Eirik Larsson på bass og Magnus Skylstad, frå dei første Longshots-åra, på trommer.
På sleppefesten i Bergen var også Gina Aspenes, Spellemannsprisvinnar frå Os, med på vokal på eit ekstranummer.
Cover teikna av elev av Picasso
EP-en, som er ein forsmak på eit album som skal koma ut til hausten, er spelt inn i Orbo sitt studio i Os, Studio Hordaland.
– Eg las ei bok om Napoleon og korleis han blei behandla ev engelskmennene, og korleis han likevel sto rakrygga. Seinare, då eg var i Paris, besøkte eg også grava hans, fortel Ole Reinert.
Historia gav inspirasjon til ei av låtene, og til coveret, som har ei unik historie.
– Eg var heldig og fekk møta den spanske kunstnaren Pedro Delso (Peter Delso Ruperéz), ein tidlegare elev av Picasso, før han døydde. Der Picasso sto bak kubismen sto Delso bak triangulismen. Eg fekk løyve av familien deira til å bruka måleriet hans med tittelen «Yo», som metyr «eg», med Napoleon som motiv.
– Familien var henrykt over at eg ville bruka det som cover.
– Heilt nydeleg eigentleg
Plata har fire låtar, Deadlock, Time To Move On, Sleep Through The Night og Man O' War.
Orbo haustar ros for «Man O' War», både Oppland Arbeiderblad og Firdaposten gjev EP-en terningkast 5.
«Anten det er høgtempo countrymusikk som på "Deadlock", eller litt halvtempo vestkustcountry som Vince Gill gjorde så glimrande på 80-talet i "Time To Move On". "Sleep Through The Night" har for så vidt same artistreferanse, men i balladeform. Heilt nydeleg eigentleg. Og det gjeld også "Man O'War". Litt meir fart, nesten marsj inn imellom. Og ein briljerande Berg-Olsen på gitar. Nærast like elegant som Mark Knopfler ville gjort det» skriv Firdaposten.
Osfest og innspeling
– Det er kjekt med så fin mottaking. No gjeld det å tilpassa musikkproduksjon av festivaljobbing framover, så begge delar kjem i mål, seier Orbo, som er med i leiinga til Osfest 1. og 2. august i år.
Festivalarrangøren meiner han likevel skal få tid til både innspeling og spelejobbar fram mot festivalen.
– Det blir ein del konsertar fremover, blant anna MOT-turnéen i mai, det er skal besøka skular i Os og andre stadar.
– Seinare i mai blir det konsert i Molde saman med Steinar Albrigtsen og Monika Nordli, også i sommar skal vi på nokre festivalar.
– Men Osfest har høg prioritet, så det blir ikkje noko turné før rundt slepp av album til hausten.