Inspirert av symjetur
Ein symjetur i Bjørnafjorden, ei reise frå Brasil til Peru og eit teaterstykke frå 50-talet er blant det som inspirerer kunstnarane som står i Vognhallen denne veka.
Bildeserie:
Fredag og laurdag kom kunstnarane til Os og bryggefest på Os Sjøfront, søndag var det presentasjon i Solbakkestova og måndag byrja dei å jobba i Vognhallen i det første bildesymposiet i Os.
– Dei er veldig produktive og jobbar lengre utover ettermiddagane enn det som i utgangspunktet var timeplanen.
– Det er berre til å koma innom og sjå dei i arbeid og få seg ein kaffikopp i teltet, seier Vidar Bratlund Mæland.
10 kunstnarar frå 6 nasjonar formar bilde og relieff som på førehand er selt til ulike bedrifter.
– Kaldt, men deilig
Annalisa Barone frå Italia er godt i gang med sitt maleri, basert på ei rykande fersk inspirasjonskjelde.
– Vi har vore på båttur og eg har bada i sjøen. Det var kaldt, men deilig, spesielt sidan det blei litt seint kvelden før, og då er det godt å vakna skikkeleg, seier Annalisa.
Ho malar alle kunstnarane om bord i ein trebåt. Det vil seia, nokre av dei er i sjøen.
– Eg bur mest i Lisboa og liker best å mala menneske, gjerne i svart-kvitt, helst ute i naturen.
Tema frå teaterstykke
Medan Annalisa var gjest under skulptursymposiet i fjor er italienaren Mirko della Bona i Noreg for første gong.
– Os er beautiful! seier han.
Men han bruker medbrakt inspirasjon.
– Mykje av kunsten min er tema frå Waiting for Godot, eit stykke av Samuel Beckett.
– Ideane til Beckett er veldig like mine idear og synspunkt, seier della Bona.
Energi frå jungelen
Også Tony Cassanelli er frå Italia. Han var med på Mæland sitt bildesymposium i Austevoll for to år sidan.
– Eg har vore to turar i Amazonas i Brasil, den eine var ei lengre reise i jungelen frå Brasil til Peru.
– Den energien og dei sansane indianarane har er heilt unike. Dei kan padla kano så stille at kaimanane (krokodille-art) ikkje høyrer dei, og dei kan høyra både apekattar og turistar på lang avstand.
– Eg prøver å visa noko av energien og krafta til indianarane i mine maleri, og eg jobbar også med eit prosjekt der kunst kan hjelpa med å bevara sårbare område i Amazonas.
Konsert i dag – trekning på laurdag
Med fire italienarar på besøk fortalte Vidar i går om stor fotballinteresse. Den interessa blei nok dempa då Italia blei sendt ut av VM.
I kveld er det musikk og ikkje fotball det handlar om.
– Fetteren min Kurt Ove Mæland kjem til Solbakkestova med band og gir oss smaksprøvar på albumet dei gir ut til hausten.
Arbeidet med kunsten held fram til og med laurdag. Laurdag klokka 13 er det trekning i Vognhallen, då får kjøparane veta kva veggpryd dei får.
Årets kunstnarar:
Annalisa Barone, Italia
Astrid Drageset, Norge
Augon Johnsen, Norge
Fabio Sciortino, Italia
Julia Landrichter, Austerrike
Miho Iked, Japan
Mirko della Bona, Italia
Tatiana Lawresz, Polen
Tony Cassanelli, Italia
Usama Alnassar, Syria