Inviterer heile fylket til dans

Fritidsleiar for PU-gruppa i Os kommune, Rita Undheim, synes ho har gjort eit scoop når ho har klart å få Ole Ivars til å bli med på dansegalla for psykisk utviklingshemma fredag 14. oktober, dagen før dei står på scenen i den opne dansegallaen for alle i Oseana.

- Eg tok kontakt med dei då eg høyrde dei skulle koma til Os for å høyra om dei var interresserte å vera med på ei tilstelling for oss, seier Rita.

- Dei tente på ideen og sa ja på omtrent strak arm, fortel Undheim.

Ho fortel at Oseana har gjort at dei no kan tenkja større og spenstigare enn tidlegare.

- Endeleg har vi eit lokale som er stort nok.

Gler seg stort

Ole Ivars har gjort tilsvarande dansegallaer andre stadar i landet tidlegare, men det er første gongen dei er med på eit arrangement på Os og i bergensregionen.

- Gutane i bandet fortel at dei gler seg stort, og at denne type arrangement er noko av det kjekkaste dei er med på, seier Undheim.

Ho har no sendt ut invitasjon til alle kommunar og institusjonar i Hordaland med tilbod til psykisk utviklingshemma.

- Den vanlege gjensynsfesten vil plar ha i gymsalen på Os barneskule samlar om lag 250 stykker, eg reknar med at Ole Ivars her i Oseana kjem til å samla det dobbelte.

Støtte frå private

For å få til arrangementet har Undheim søkt om økonomisk støtte frå fleire hald.

- Vi har private som har gått inn med ein stor sum pengar, det er bedrifter som eg reknar med kjem med bidrag. I tillegg har vi søkt fylkeskommunen om bidrag.

Nettopp fylkeskommuen har stilt seg positive til arrangementet.

- Dei ønskjer at kommunane lager fellesarrangement av denne typen slik at ikkje alle sit heime på si eiga tue og ikkje kjem seg ut.

Alle gode ting er tre

Dette blir det tredje arrangementet for denne målgruppa som Os kommune er engasjert i.

- Frå før har vi Kyprosturane i samarbeid med Vitaltour, vi har vinteraktivitetsdag på Kvamsskogen saman med Kvam kommune, og no dreg vi i gang dansegallaen som vi håper òg kan bli eit årleg arrangement, avsluttar Rita Undheim med eit smil.