Inviterer til boblande kveld

Wine Makers Dinner er eit kjend fenomen i dei større byane, kor kjente restaurantar får besøk frå eit vinhus og lager mat som passar til den vinen som skal serverast den kvelden.

- Det er gjerne ei ganske eksklusiv happening kor det berre er inviterte gjester som pleier å sleppa inn, forklarar Christian Stokke Mathisen i restaurant Færingen.

- No tek vi konseptet til Os for det eg trur er første gong i historia.

- Vi har vald å ha det som eit ope arrangement kor kven som helst kan bestilla bord og ta del i opplevinga, ikkje berre dei vi skulle velge å invitera, seier Stokke Mathisen.

Berre to restaurantar i Noreg

Til Færingen har han fått Juliette Monmousseau, den eldste dottera til vinmakar og sjef for det franske vinhuset Bouvet Ladubay Patrice Monmousseau til å koma.

- Juliette er ansvarleg for eksport og markedføring i vinhuset og kjem til Noreg for å vitja oss som einaste restaurant utanom Oslo.

- I Oslo skal ho ha ei eksklusiv vitjing hos ein av dei nyaste restaurantane på Grünerløkka, Hjort, forklarar Stokke Mathisen.

Lovar ein boblande aften

Bouvet er kjend for sine boblande vinar. Tysdag blir fire av dei servert eksklusivt i Færingen.

- Mellomanna har Juliette med seg roséboblane "Bouvet Rosé Brut" som ikkje lanserast i markedet før i september.

- Det tykkjer vi er litt stas, så kjøkkenet kjem til å legge seg ekstra i selen for å laga noko godt som passar til, smilar Stokke Mathisen.

- Ja, kva kan gjestane venta seg på fata i morgon?

- Det blir eindel av overraskinga. Eg vil ikkje røpe menyen no, men det har med nærhet til sjøen å gjera.

- Vi har framleis nokre ledige bord, så om det er nokon som har lyst å få med seg 4 rettar inkludert vin og ein aperitif er det berre å kontakte oss på e-post eller telefon, reklamerar Stokke Mathisen før han legg til at båe deler finns på Oseana si heimeside.

Stamgjestar på plass

Færingen har vore i drift sidan Oseana opna dørane 17. juni, mest kvar einaste dag med full restaurant.

- Vi har fått ein utruleg start med mykje positiv respons både på maten, servicen og ikkje minst beliggenheten.

- Kven er det som kjem for å spise hjå dykk?

- Det er alle, både unge og gamle.

- Allereie har vi fått nokre stamgjestar, noko vi tykkjer er veldig kjekt.

- Ellers så er det mange osingar som nyttar oss, men vi har òg bergensarar som kjem eins ærend for å prøve oss og feriegjestar som har hørt om huset og restauranten og vil teste oss ut, forklarar Stokke Mathisen.

- Dykk har fått litt kritikk for ikkje å kunne tilby is til ungane. Kjem det snart?

- Isvogna er allereie på plass, men det har jo ikkje vore vêr til å ta ho skikkelig i bruk. Men så fort sola kjem for fullt kan eg love deg ei smaksoppleving også på isfronten, avsluttar Stokke Mathisen.