Inviterer til kurs i visuelle fag

Våren 2015 testa Os kulturskule ut eit særs intensivt kurs i visuell kunst over to dagar i samband med Bergen kulturskule si sommarutstilling i Griegsamlinga.

– Det var eit veldig populært tilbod og blei fort fullteikna, så no tek vi det litt vidare, fortel rektor Christian Breistein ved Os kulturskule.

Sju veker langt kurs

No lanserar dei nemleg eit kurs over sju veker fram mot utstillinga som opner 13. mai, kor kulturskulane i Hordaland samlast til i Griegsamlinga.

– Sjølv om vi ikkje har eit fast tilbod om visuell kunst i Os kulturskule, så må vi jo sjølvsagt vera med på den utstillinga.

To grupper på Nore Neset

Kurset vil ha plass til maksimalt 16 elevar.

– Eg har nett fått stadfesta at vi får låne lokaler på Nore Neset Ungdomsskule, så då startar vi opp torsdag i neste veke.

– Vi har plass til to grupper, kvar på inntil åtte elevar. Kvar gong er kurset halvannan time. Påmelding kan ein gjera på kulturskulen si heimeside frå i morgon av og prisen blir tilsvarande som sju vekers deltaking på kulturskulen, nemleg 500 kroner, fortel rektoren.

Kurset er for born og unge i kulturskulealder.

Låner lærar frå Bergen

Sidan Os kulturskule ikkje har eigne lærarar i visuelle fag har dei inngått eit samarbeid med storebror i Bergen.

– Vi har fått låna lærarkrefter frå Bergen. Han har allereie ein idé til eit prosjekt han vil gjera med elevane, som endar opp i at også Os blir representert på fylkesutstillinga i mai, avsluttar Breistein.