– Isen er ikkje trygg!

Bildeserie:

1 av 6

– Person gjennom isen ved Åsen. Har lege i vatnet i om lag ein time.

Dette var meldinga som kom inn til 110 klokka 10.15 i dag. Det heile var iscenesett av varabrannsjef Arne Monsen. Resten av mannskapen visste ikkje at dette var ei øving.

Gjekk ut trippelvarsling

– Ingen visste om dette på førehand, fortel Monsen. Vi plar øva i lag med jamne mellomrom, men kva som skulle «skje» i dag, var det ikkje mange fleire enn meg som visste om.

– Difor er det då endå kjekkare å sjå at brann, politi og helse løyser oppdraget på ein så god måte som vi har sett her i dag, legg Monsen til.

– Politiet var først på staden og kunne gje oss i brann og redning viktig informasjon mens vi var undervegs. Det same gjaldt kommunikasjonen til helse etterkvart som dei var på veg. Dette gjer at mannskapa kan nytta utrykningstida til å førebu seg yttarlegare på kva som møter dei når dei kjem fram. Øvinga i dag fekk testa heile apparatet, og det einaste som mangla her var at luftambulansen hadde vore involvert.

– Bra å bli lurt

På spørsmål om korleis øvinga gjekk, og korleis det er å bli «lurt» av Monsen på denne måten, seier utrykningsleiar Morten Moberg at slike øvingar er heilt naudsynt.

– Vi veit at det kjem øvingar med jamne mellomrom, men vi veit aldri kva innhaldet eller situasjonen vert. Vi går inn i kvart varsel som ei reell hending, og at vi etterkvart skjønar at det er ei øving endrar ingenting.

– Pulsen er like høg på ei øving, og etterpå set vi av tid til å evaluera oss sjølve og kvarandre. Konstruktiv kritikk mellom einingane er noko vi held høgt, fortel Moberg.

God fagleg diskusjon

Etter at den forulykka isvandraren var på plass i ambulansen, avslutta varabrannsjef Monsen øvinga.

Dei involverte mannskapa frå politiet, brannvesenet og helsetenesta fekk alle koma med sine opplevingar og tankar kring øvinga. Mellom anna fekk brannvesenet skryt for innsatsen då dei kom til ulykkesstaden.

– Det var resolutt opptreden frå dykk då de kom fram, kunne operasjonsleiaren til politiet fortelja.

Brannmannskapa svara med å fortelja korleis dei hadde nytta tida undervegs i brannbilen til å fordela oppgåvene.

– Då var det ingen tvil om kven som skulle gjera kva når vi kom fram, fortalde Kjersti Lien frå brannvesenet.

Gjentek at isen ikkje er trygg

Arne Monsen fortel at isen på vatna i Os kommune vart målt for to dagar sidan, og han har ei klar melding;

– Isen er ikkje rekna som trygg å ferdast på!