Jobbar som om det blir streik
• Kuventræ og Os SFO kan bli stengt• 7 av 11 søkjarar har fått fritak frå streik• Det er frivillig mekling klokka 11 i dag
Fredag kom meldinga om at streiken i Os blir utvida kraftig frå i morgon av.
Les òg: Frå 6 til 66 ut i streik
– Vi mottok 11 søknadar om dispensasjon og har innvilga 7 av dei. Nokre av dei siste fire kan også bli innvilga om vi får yttarlegare informasjon til søknaden, seier leiar i Fagforbundet i Os, Hege Bjørnør.
Alle dei innvilga søknadane er frå tilsette som jobbar med ungar med særskilte behov.
– Os kommune har vore reinhåra når det kjem til dispsensasjonssøknadane, det er utelukkande rett type søknadar vi får til behandling.
– Dei tilsette i fylket, altså Os vgs som er ramma, oppfører seg også som dei skal. Streikevaktane har ingenting å gjera på i Os, alle følgjer spelereglane, slår ho fast.
Os vgs har fått dispensasjon til å ta reinhaldarane inn for reingjering av enkelte toalett.
Kuventræ hardast ramma
Om det blir utviding i streiken blir dette konsekvensane i Os, ifølgje oskommune.no:
• SFO på Kuventræ skule blir stengt frå onsdag klokka 12.20 (ikkje frå morgonen av, slik kommunen skriv).
• SFO på Os skule får redusert opningstid ondag og torsdag og blir heilt stengt frå fredag.
• På fleire skular vil tilbodet til born som treng forsterka tilbod verta ramma. Skulane vil her informera direkte til foreldre/pårørande.
– Alle våre assistentar og barne- og ungdomsarbeidarar er tatt ut, seier rektor ved Kuventræ skule, Per Olav Sørås.
Men dei to som skal på SFO onsdag morgon er ikkje tatt ut i streik.
– Derfor stenger vi ikkje før klokka 12.20, seier Sørås.
Blant dei 11 som har søkt dispensasjon er det ingen frå Kuventræ.
– Førebels så klarer vi oss, men det kan koma søknad også på vegne av nokre av våre tilsette.
– Men eg ser òg at førsteklassingane kan bli ramma. Det er lenge for ein lærarar å vera åleine med over 20 så unge elevar ein heil skuledag, så det kan henda at vi over helga vil redusera timetalet litt, om det blir streik og denne held fram.
Pliktar å halda seg informert
Om det blir ei løysing innan planlagt streikestart onsdag morgon er førebels uvisst, men ikkje umogleg.
– Partane skal møtast til frivillig mekling klokka 11 i dag, fortel Bjørnør.
– Vi førebur oss som om det blir utviding i streiken, men den kan fort bli avblåst. Dei som er tatt ut i streik pliktar å halda seg oppdatert utover kvelden og onsdag morgon.