Julegrantenning med dinosaur og drive-through

Førstkomande laurdag er det tenning av julegran på AMFI Os.

Det er nokre år sidan senteret gjekk vekk frå å ha gran ute, og har i staden tent julelys eller julegran inne på senteret.

• VIDEO: Kristina og Marius song på julegrantenninga i fjor

– I år tar vi det ut igjen, denne gong ved Hitzone og inngangen ved Baker Brun, seier senterleiar Siri Ann Myhren Dalseide.

For å unngå at folk står tett i desse smitteverntider, blir tenninga rett etter stengetid laurdag, og julesnop blir levert inn i bilane til dei som vil ha det med seg.

– Nokre sit gjerne i parkerte bilar mens andre kjem til tenninga, så vi vil laga eit system på trafikken, og ha folk ute på dirigering. Fleire frå butikkane hjelper nissen å dela ut snop.

Skummel overrasking frå nyoppussa Ringo

Saman med tenninga av grana og litt snacks inn vindauget kjem det til å koma eit utradisjonelt innslag denne kvelden.

– Ein 2,5 meter høg og 5 meter lang dinosaur blir med oss denne kvelden. Den lager skumle lydar, men skal vera heilt ufarleg, lover senterleiaren.

– Dette året har vore så rart at eg tenkte «kvifor ikkje ein dinsaur på julegrantenninga?» legg ho til og ler.

Dinosauren er kjøpt inn av Ringo Pluss, og blir å sjå på senteret seinare òg. Leikebutikken har nyleg pussa opp, og har nyopning av lokalet måndag, i starten på Black Week.