Kan bli bru mellom Os og Fusa

Ordførar Terje Søviknes (Frp) orienterte i formannskapet tysdag om ei ny ordning som kan gjera det realistisk å få bru mellom Os og Fusa i ikkje alt for lang framtid.

– Eg har i eit par år jobba med Helge-Andre Njåstad (Frp, leiar av kommunalkomiteen på Stortinget, journ.mrk) om ei ordning som heiter «ferjeavløysingsordning for fylkesveg». Det har nemleg vore ei slik ordning for riksvegar, kor ein har kunne delfinansiera bruer og vegsamband.

– Då har ein med statleg hand sett på kostnadane med drift av ferjer og kunne nytta dette til å byggja riksveger, forklarte Søviknes.

19 millionar i 40 år

Stortingsfleirtalet påla tidlegare i år regjeringa til å utgreiia dette til å gjelde for fylkesvegar også. I samband med kommuneproposisjonen kom retningslinene.

– Slik det er no så får fylket ein rund sum på 19 millionar kroner for kvar fylkesferje. Fylkeskommuner som vil byggje bruer til erstatning for ferjer kan få desse 19 millionane, med eit lite fratrekk til vedlikehald av bruene, for å byggje bruene. Ordninga er slik at du kan få 19 millionar over 40 år, tilsaman akkumulerer det seg til store beløp, fortalde Søviknes.

Realistisk med bru

Dermed kan det bli realistisk å tenkja seg ei bru mellom Os og Fusa. I møtet trakk Søviknes Masfjordbrua som eit døme. Denne har det vore jobba med over fleire år, mellom anna fordi ein vil utgreia flytebruteknologi som ein modell for andre fylkesvegar. Berekningar for denne brua syner at ein vil sitta igjen med 680 millionar i noverdi, tilsvarande om lag det ein trur brua vil kosta.

– Eg har i dag kome med eit heilt konkret utspel på at vi bør sjå på moglegheiten for ei bru mellom Os og Fusa.

– I samband med kommunereforma ligg det nemleg inne ei anna tilskotsordning kor kommunar som seier ja til å slå seg saman, kan søka om eit tilskot på 5 millionar kroner til infrastrukturtiltak. Eg tenkjer at det er heilt naturleg for Os og Fusa å bruke dette for å skaffe seg ein skikkeleg utgreiing på korleis bru kan la seg realisera gjennom ferjeavsløysningsmidla.

– Kan ein slenge på eit kulepunkt i eit vedtak om å slå seg saman at det skal på plass ein bru, for å bruke det som pressmiddel, undra Helge Steinum (AP).

– Det er mykje utgreiing som skal gjerast, mellomanna med konsekvensutgreiingar, så det er nok ikkje sikkert ein rekk det, men blir det positive vedtak i Os og Fusa om å slå seg saman, så er det mogleg å søkje dei 5 millionane for å starta prosessen, svara Søviknes.

Han meiner det var eit viktig punkt å løfta fram no, før dei to folkemøta om kommunesamanslåinga, sidan fjorden og samankobling av dei to kommunane har vore løfta som eit argument mot ei eventuell samanslåing.