Kan bli skule

Når ombygginga av Os ungdomsskule tek til i haust ønskjer kommunen å flytta elevane ut for å få ei mest mogleg effektiv drift.

I førre veke sendte difor prosjektavdelinga i kommunen inn søknad om å få byggja om Bøe & Lepsøy sine lokaler i landboden.

Les óg: - Økonomien ser bra ut

- Vi har starta ein formell prosess etter plan- og bygningslova for å sjå om det lar seg gjera å nytte desse lokala som mellombelse undervisningsrom, fortel rådmann Knut Terje Rekve.

Brann, rømning og ventilasjon

Det er ei rekkje krav som må vera oppfylt før elevar og lærarar kan flytta inn. Difor er ikkje rådmannen 100% sikker på at det blir Landboden-løysinga som blir vald.

- Lova stiller strenge krav om brannsikring, rømningveger og ventilasjon.

- Det er desse detaljane vi no ønskjer å få avklart gjennom søknaden.

Landboden det beste alternativet

Rådmannen er klar på at løysinga med Landboden er den dei helst ønskjer å koma i mål med.

- Det er praktisk med kort veg til resten av skulen, samstundes som elevane får trygge tilhøve medan ombygginga pågår.

- Eg håpar det skal la seg gjer å bruke desse lokala, men vi har òg andre alternativ som brakkeløysingar på teiknebrettet, fortel Rekve.

Ei siste løysing er å stengje ned mindre delar av skulen medan arbeida pågår, men dette vil vera ei dyrare og mindre tilfredsstillande løysing.

- Om vi kan stengje ned ein heil fløy av skulen om gangen, så hadde det vore best. Det gir den mest effektive ombygginga, noko vi vil spare pengar på.

Fire klasserom

Planteikningane som følgjer søknaden syner at ei ombygging av Landboden vil gje fire klasserom og fire grupperom i tillegg til toalett og garderobar.

Dei reint praktiske tilhøva som kven som skal nytte klasseromma og korleis undervisninga skal leggast opp er sålangt ikkje klart.

- Eg reknar med at Ingvar (Torsvik, journ.mrk) tek tak i dette saman med rektor så fort han er tilbake frå ferie, avsluttar rådmann Knut Terje Rekve.