Kan få starten på «Tour des Fjords»
I fjor passerte sykkelstjerner som Alexander Kristoff og Evald Boasson Hagen gjennom Osbygda i løpet av nokre få sekund på den første etappa i Tour des Fjords. I år kan det, om næringslivet og kommunen vil, bli mogleg å få sjå meir til sykkelstjernene.
Det er nemleg allereie bestemt at starten skal gå i Hordaland, men kor i fylket er enno ikkje spikra.
På seminar med Os Næringsforum fredag fridde ordførar Terje Søviknes (Frp) til næringslivet.
– Klarar vi å få til eit spleiselag kan vi få starten av heile rittet til Os, fortalde Søviknes då han utfordra næringslivstoppane.
Hastar å få på plass
Kommunen vil vera med på spleiselaget, men kan ikkje ta heile kaka aleine.
– Dette er eit krydder og ikkje ei kjerneoppgåve for kommunen. Vi vil vera med, men kan ikkje ta det aleine.
Søviknes fortalde at kostnaden med arrangementet vil vera på rundt 300 000 kroner, og at det hastar med å få ei avgjer. Grunna korte tidsfrister ser han for seg å få ei sak opp til formannskapet allereie 18. februar.
Folkefest og liv
Det å få heile det internasjonale sykkelsirkuset med TV2 og andre medier på slep kan vera ein enorm marknadsføringsmoglegheit for Osbygda.
– Her kan vi virkeleg få vist fram bygda og skape folkeliv. I tillegg kan vi sjå for oss barneritt og andre aktivitetar i tilknytning til sjølve sykkelrittet, påpeika Søviknes.
Tour des Fjords 2016 startar i Hordaland 31. august før det går vidare til Ryfylke og Rogaland før rittet blir avslutta i Stavanger søndag 4. september.