Kan spara 2,26 millioner

Då kommunestyret skulle handsama 1. teritalrapport tysdag, med eit framlegg om å starta ein prosess med tanke på at ein frå og med andre halvår i 2015 og inntil vidare flyttar elevar i 5. til 7. trinn frå Strøno barneskule til Nore Neset barneskule, blei kommunalsjef Line Rye utfordra på å legga fram kor stort innsparingspotensialet er.

– Vedtaket omfattar å starta ein prosess. Vi hadde i den samanhengen tenkt å legga fram dei konkrete tala, men har reikna på det.

– Ut frå 2014-tal har vi rekna oss fram til at om vi flyttar 5. til 7. trinnet med 21 elevar, frå hausten 2015, så vil det gje ein effekt på heile skuleåret på 2,26 millionar kroner. Effekten for 2015 vil vera om lag 1 million.

– Då vil klassene bli flytta til Nore Neset skule med felles rektor og administrasjon. Det betyr at Strøno blir ein filial under Nore Neset.

– Om vi skulle flytta heile Strøno barneskule med 55 elevar til Nore Neset ville nettoeffekten bli 3,7 millionar for heile skuleåret og 1,68 millioner frå hausten 2015, forklarte Rye.

Vil ikkje, men ...

Før Rye sleppte til med tala hadde politikarane drøfta saka vel og lenge.

– Spørsmålet om Strøno går vi imot. Med alle dei arealplanane som er vedtatt der ute så er det ei normal forventning blant alle som bur der at dei skal få gå på skulen der dei bur, argumenterte Lars Atle Skorpen (Ap).

– Vi står på forslaget frå formannskapet om å starta ein prosess, sa Marie Bruarøy (H).

– Det er ein høg pris å betala for å få balanse.

– Skulen er eit midtpunkt i Strøno og eit sosialt senter like mykje som ein skule. Har rådmannen tenkt på at det er stor utbyggingspotensiale i Strøno? Vil det bli like attraktivt å busetja seg der om skulen ikkje er der, og kor lang tid vil Nore Neset ha kapasitet? spurde Emil Tetlie Brimsholm (H).

– Eg vil presiera at administrasjonen er sett til å følgja opp eit politisk vedtak. Vi har ikkje sagt at vi vil legga ned Strøno barneskule, men utnytta ledig kapasitet på Nore Neset.

– Difor vil vi vidareføra 1. til 4. klasse som eit barnetun, slik at vi raskt kan utvida igjen om det trengs, påpeika Eirik André Hesthamar (Frp).

Tolka annerleis enn venta

Rådmann Knut Terje Rekve fortalde at han opplevde at punktet om Strøno barneskule hadde blitt tolka annleis enn han hadde venta.

– Det står inntil vidare. Eg er ganske overbevist om at vi ikkje snakkar om å legga ned Strøno barneskule, ein gong i framtida kan det faktisk bli aktuelt å bygga ut. Det er mykje gult på kartet der ute.

– Men der vi er akkurat no, så har vi kapasitet på Nore Neset. Difor var tanken INNTIL VIDARE å gjera ei omlegging. Det må eg bli trudd på, ba Rekve.

Ba om gruppemøte

Etter debatten og informasjonen frå Rye ba Espen Aspenes (Frp) om eit gruppemøte.

– Dette er ei viktig sak. Vi går, etter å ha diskutert i gruppemøte, for innstillinga frå formannskapet om å starta ein prosess, forklarte Gustav Bahus (Frp) då partia kom tilbake i kommunestyresalen.

– Men vi vil gå grundig gjennom talmaterialet. Det er ikkje å stikka under ein stol at vi vil sjå nøye på tala som blir lagt fram, sa Bahus, som ei åtvaring til administrasjonen.

– Vi er blitt endå meir overbevist om at standpunktet vi hadde i formannskapet om å fjerna punktet frå vedtaket er det rette etter dagens debatt. Vi kjem difor å stemma imot, forklarte Eirik Neverdal (TvS).

Kommunestyret røysta deretter for å starta prosessen mot 13 røyster (7 Ap, 4 TvS, 1 Sp og 1 V).